Batumelebi | ტრამპის იმპიჩმენტს ამერიკის კონგრესში მხარი დაუჭირეს ტრამპის იმპიჩმენტს ამერიკის კონგრესში მხარი დაუჭირეს – Batumelebi
ნეტგაზეთი • RU

ტრამპის იმპიჩმენტს ამერიკის კონგრესში მხარი დაუჭირეს

დონალდ ტრამპის იმპიჩმენტს ამერიკის შეერთებული შტატების წარმომადგენელთა პალატამ მხარი დაუჭირა. ამერიკის პრეზიდენტს ძალაუფლების ბოროტად გამოყენებასა და კონგრესისთვის ხელის შეშლას ედავებიან. კონგრესის ამ გადაწყვეტილების შემდეგ გადაწყვეტილება იმპიჩმენტზე სენატმა უნდა მიიღოს.

იმპიჩმენტის პროცედურა მას შემდეგ დაიწყო, როცა გასაჯაროვდა დონალდ ტრამპსა და უკრაინის პრეზიდენტს, ვოლოდიმირ ზელენსკის შორის სატელეფონო საუბარი. ამ საუბრის შემდეგ ტრამპმა უკრაინას გამოყოფილი სამხედრო დახმარების თანხის გადაცემა გაუჭიანურა. პრეზიდენტის საიმპიჩმენტო გამოძიება 24 სექტემბერს დაიწყო.

კონგრესის წარმომადგენელთა პალატაში იმპიჩმენტს მხარი, პირველი ბრალდების საფუძველზე, 230-მა კანონმდებელმა დაუჭირა, წინააღმდეგი იყო – 197. მეორე ბრალდების გამო კი, იმპიჩმენტის მომხრე 229 კონგრესმენი იყო, წინააღმდეგი – 198. კონგრესში უმრავლესობა „დემოკრატებს“ აქვთ.

სენატში ორი-მესამედის მხარდაჭერაა საჭირო იმისთვის, რომ ტრამპი თანამდებობიდან გადააყენონ. სენატში უმრავლესობა „რესპუბლიკელებს“ აქვთ. ამერიკულ მედიაში ელიან, რომ სენატი ტრამპის იმპიჩმენტს მხარს არ დაუჭერს. სენატში ჯერ არ გადაუწყვეტიათ, როდის განიხილავენ ტრამპის იმპიჩმენტის საკითხს.

ტრამპი აშშ-ის მესამე პრეზიდენტია, რომლის იმპიჩმენტსაც წარმომადგენელთა პალატამ მხარი დაუჭირა. მანამდე კონგრესის ქვედა პალატამ იმპიჩმენტი გამოუცხადა ენდრიუ ჯონსონს [1868 წელი] და ბილ კლინტონს [1998 წელი], თუმცა ორივე მათგანი სენატმა გაამართლა. იმპიჩმენტის პროცედურამდე თანამდებობიდან გადადგა პრეზიდენტი რიჩარდ ნიქსონი [1974 წელი].

ნეტგაზეთის მასალების სხვა გამოცემებში გადაბეჭდვის წესი
ავტორი