2 ნოემბერს მსოფლიოს მასშტაბით მომიტინგეები ქურთული სახელმწიფოებრივი წარმონაქმნის, როჟავას მხარდასაჭერად შეიკრიბებიან. აქციებს ქურთული სოლიდარობის ქსელები ფეისბუქგვერდების საშუალებით გეგმავენ.
მიმდინარე წლის 9 ოქტომბერს, თურქულმა მხარემ სირიაში დაიწყო სამხედრო ოპერაცია სახელწოდებით „მშვიდობის გაზაფხული“. ოფიციალური თურქეთი ამბობდა, რომ ამ ოპერაციის მიზანი, თურქეთ-სირიის საზღვარზე 32 კმ-იანი უსაფრთხო ზონის შექმნა და ამ ზონაში სირიდან დევნილი მოსახლეობის დაბრუნება იყო.
მსოფლიოს გარშემო დაგეგმილი აქციის მონაწილეებს კი სურთ მხარი დაუჭირონ როჟავას და გააკრიტიკონ თურქეთის სამხედრო პოლიტიკა.
ვებგვერდზე – www.riseup4rojava.com მითითებულია ადგილები, სადაც იკრიბებიან ქურთების მხარდამჭერები. აქციები გაიმართება: ავსტრალიაში, ავსტრიაში, ბრაზილიაში, ბულგარეთში, კანადაში, კვიპროსზე, ჩეხეთში, დანიაში, ფინეთში, საფრანგეთში, გერმანიაში, საბერძნეთში, იტალიაში, ჰოლანდიაში, პორტუგალიაში, რუსეთში, ესპანეთში, შვედეთში, შვეიცარიაში, ბრიტანეთსა და აშშ-ში.
2 ნოემბერს, 18:00 საათიდან, თბილისში, თურქეთის საელჩოსთანაც შეიკრიბებიან ადამიანები თურქეთის პოლიტიკის გასაპროტესტებლად.
სოციალურ ქსელებში ჰეშთეგით #riseup4rojava ადამიანები აქვეყნებენ მხარდამჭერ პოსტებს, აზიარებენ ახალ ამბებს როჟავაში მიმდინარე მოვლენებთან დაკავშირებით.