ენმ: არ ვაპირებთ აჭარის ტელევიზიის მრჩეველთა საბჭოში კანდიდატის დასახელებას


დღეს, 28 ოქტომბერს, უმაღლესი საბჭოს წევრმა „ერთიანი ნაციონალური მოძრაობიდან“, გიორგი დიასამიძემ პარტიის ოფისში ბრიფინგი გამართა და განაცხადა, რომ „ნაციონალური მოძრაობა“ არ აპირებს საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს არჩევნებში კანდიდატის დასახელებას. ენმ-ს, როგორც ოპოციზიას, უფლება აქვს, თავისი კვოტით ერთი კანდიდატი წარადგინოს.

„ჩვენ მივიღეთ გადაწყვეტილება, რომ დარჩენილი კანდიდატებიდან მხარს არავის დავუჭერთ და არც ჩვენ დავაყენებთ კანდიდატს ჩვენი კვოტით. ჩვენ ამ პროცესში მონაწილეობას არ მივიღებთ,“ – აცხადებს გიორგი დიასამიძე.

მისი თქმით, საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს დაკომპლექტებისთვის ახალი კონკურსი უნდა გამოცხადდეს.

„ის, თუ როგორ დაკომპლექტდა საარჩევნო კომისია და წარიმართა პროცესი, აჩვენებს, რომ მრჩეველთა საბჭო იქნება ცალსახად ერთპარტიული, ერთი პარტიის ინტერესზე მორგებული, რომლის მიზანიც არის მმართველმა პარტიამ გავლენა მოიპოვოს აჭარის საზოგადოებრივ მაუწყებელზე,“ – ამბობს დიასამიძე.

აჭარის საზოგადოებრივი მაუწყებლის რჩეველთა საბჭოში სულ ხუთი წევრია. ამჟამინდელ მრჩეველთა საბჭოს ხუთი წევრიდან ოთხს ეწურება უფლებამოსილების ვადა, სწორედ მათ ადგილებზეა კონკურსი გამოცხადებული.

მმართველი პარტიის ორმა ფრაქციამ აჭარის უმაღლეს საბჭოში თავიანთი კანდიდატები უკვე დაამტკიცეს მრჩეველთა საბჭოში, უმაღლესი საბჭოს დამოუკიდებელ წევრებს ორი კანდიდატი ჰყავდათ დასახელებული, აქედან ერთმა, ხმების საკმარისი რაოდენობა მიიღო. დარჩენილია მხოლოდ ერთი, ოპოზიციის კვოტა, რომელიც, დღევანდელი განცხადების თანახმად, თავისუფალი დარჩება.

ახალგაზრდა იურისტთა ასოციაციის განცხადებით,  სსიპ აჭარის ტელევიზიისა და რადიოს მრჩეველთა საბჭოს წევრობის კანდიდატების წარდგენა განხორციელდა „მაუწყებლობის შესახებ“ საქართველოს კანონით დადგენილი წესის დარღვევით.

მეტი ამ თემაზე: 

საია: აჭარის ტელევიზიის მრჩეველთა საბჭოს წევრების არჩევა კანონდარღვევით მიმდინარეობს

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com