რატომ არ შემოდიან ბათუმში საკრუიზო ლაინერები? – საზღვაო შრომის ბაზრის კვლევა


“ბათუმის საზღვაო პორტის ინფრასტრუქტურა არ არის მიმზიდველი ფართომასშტაბიანი საკრუიზო ლაინერებისთვის… 2016 წლიდან არც ერთი საკრუიზო ლაინერი არ შემოსულა ბათუმში,” – აღნიშნულია კვლევაში, რომლის მიზანიც საზღვაო შრომის ბაზრის შესწავლა იყო. კვლევა “სოციალური კვლევისა და ანალიზის ინსტიტუტმა” ჩაატარა აჭარის დასაქმების სააგენტოს დაკვეთით.

კვლევის ფარგლებში სხვადასხვა სამიზნე ჯგუფი გამოკითხეს, მათ შორის, საერთაშორისო საკრუინგო კომპანიები, უმაღლესი სასწავლებლები, მეზღვაურები, კაპიტნები.

“გამოჩნდა, რომ საკრუინგო დასაქმების სფერო არ არის რეგულირებული სახელმწიფოს მიერ… საქართველო ასევე არ არის საზღვაო სფეროში საერთაშორისო ორგანიზაციების ქსელის წევრი,” – აღნიშნა სოციოლოგმა იაგო კაჭკაჭიშვილმა კვლევის შედეგების პრეზენტაციის დროს, რომელიც დღეს, 18 ოქტომბერს, სასტუმრო “ადმირალში” გაიმართა.

კვლევის მიხედვით, ზოგადად მსოფლიოში საკრუიზო ტურიზმის ხარჯთეფექტურობა შემცირდა. გარდა ამისა, ევროკავშირის ქვეყნებში ახალგაზრდებს მეზღვაურის პროფესიის მიმართ დაბალი მოტივაცია აქვთ.

იაგო კაჭკაჭიშვილის შეფასებით, საკრუინგო მიმართულებით საქართველოს გააქტიურება უმუშევრობის დონეს შეამცირებს და ამ რეალობას დროულად უნდა “გავუსწოროთ თვალი”.

“ჩვენ არ ვიყენებთ ამ პოტენციალს. საკრუინგო გემებზე დასაქმებულთა საშუალო ხელფასი 1000-1500 ამერიკული დოლარია… ლეგალური დასაქმება შეამცირებს არალეგალურ შრომით მიგრაციას.

ქართველი მეზღვაურების შემთხვევაში, პრობლემად რჩება პრაქტიკის გავლა, ინგლისური ენის სწავლება უმაღლეს საზღვაო და პროფესიულ სასწავლებლებში,” – ამბობს იაგო კაჭკაჭიშვილი.

საკრუიზო ლაინერებისთვის არის თუ არა დაგეგმილი შესაბამისი ინფრასტრუქტურის მოწყობა? – ვკითხეთ საზღვაო სააგენტოს წარმომადგენელს, ნინო ორაგველიძეს, რომელიც ამ შეხვედრას ესწრებოდა. მან გვიპასუხა, რომ პორტი კერძო კომპანიისთვის აქვს გადაცემული სახელმწიფოს და სააგენტო ამ კუთხით ინფორმაციას არ ფლობს.

რაც შეეხება საერთაშორისო კანონმდებლობასთან თანხვედრას, ნინო ორაგველიძემ გვითხრა, რომ “მეზღვაურთა შრომის კონვენციის” პროცესი უკვე დაწყებულია და საქართველო 2020 წელს გახდება ამ კონვენციის წევრი.

 

ნეტგაზეთის მასალების სხვა გამოცემებში გადაბეჭდვის წესი
ავტორი