განათლება,მთავარი,სიახლეები

რა შემთხვევაში შეიძლება ისწავლოთ 3-წლიან საბაკალავრო და 1-წლიან მაგისტრატურის პროგრამებზე

17.10.2019 • 3776
რა შემთხვევაში შეიძლება ისწავლოთ 3-წლიან საბაკალავრო და 1-წლიან მაგისტრატურის პროგრამებზე

საქართველოს განათლების მინისტრის ბრძანება ძალაში შევიდა, რომლის მიხედვით უმაღლეს საგანმანათლებლო დაწესებულებებს უფლება აქვთ  შეიმუშაონ ბაკალავრიატის  სამწლიანი და მაგისტრატურის ერთწლიანი პროგრამები, თუმცა, როგორც განათლების ხარისხის განვითარების ეროვნულ ცენტრში „ბათუმელებს“ უთხრეს, ჯერჯერობით, აკრედიტაციასთან დაკავშირებით არც ერთ უნივერსიტეტს განაცხადი არ გაუკეთებია.

რა შემთხვევაში შეუძლია უმაღლეს საგანმანათლებლო დაწესებულებას სასწავლო წლის შემცირება და რა შემთხვევაში არა – ამის თაობაზე „ბათუმელები“ცენტრის კვალიფიკაციების განვითარების სამმართველოს უფროსს, ნინო ბერელიძეს ესაუბრა.

„ევროპის ბევრ ქვეყანაში ბაკალავრიატის მოცულობა ძირითადად სამი წელია, ამიტომ ერთობლივი პროგრამების განხორციელებისას, როცა ორმაგი კვალიფიკაციის მინიჭება ხდება, უნივერსიტეტებს პრობლემები ექმნებოდათ. ამიტომ, ვიფიქრეთ, რომ ეტაპობრივად ეს ნაბიჯები უნდა გადაგვედგა,“ – გვითხრა ნინო ბერელიძემ.

ახალ მოდელთან დაკავშირებით შეხვედრა გაიმართა უნივერსიტეტების რექტორებთანაც, თუმცა, როგორც ნინო ბერელიძე გვეუბნება, მათ ამ ეტაპზე ახალ მოდელზე გადასვლის მზაობა ვერ გამოავლინეს.

„იმ სფეროებში, რომლებიც უფრო მეტად არის პრაქტიკაზე ორიენტირებული, შევთავაზეთ, რომ შემოგვეტანა 3-წლიანი ბაკალავრიატები, თუმცა, რექტორების პოზიციაა, რომ პირველ ეტაპზე იქნებ მასიურად არ შემოვიდეს სამწლიანი ბაკალავრიატი, სანამ დამტკიცებული არ არის უნივერსიტეტების დაფინანსების ახალი მოდელი და ახალი ხარისხის სტანდარტები.

ასევე, გამოსაკვლევია შრომის ბაზრის მოთხოვნები, რადგან ყოველ სამ წელიწადში, როცა ბაკალავრებს გავუშვებთ, რამდენად იქნება მზად შრომის ბაზარი მათ მისაღებად,“ – ამბობს ნინო ბერელიძე.

ამის მიუხედავად, შეთანხმება მიღწეულია იმაზე, რომ ევროპულ უნივერსიტეტებთან ერთად შემუშავებულ ერთობლივ პროგრამებს არ ექნება დაბრკოლება და საქართველოში დაინერგება სამწლიანი საბაკალავრო პროგრამები ყველა სფეროში, გარდა რეგულირებადი სფეროებისა.

ნინო ბერელიძის თქმით, სახელოვნებო და შემოქმედებითმა სასწავლებლებმა, მათ შორის კონსერვატორიამ და სამხატვრო აკადემიამ, გამოთქვეს სურვილი, რომ გადავლენ სამწლიან საბაკალავრო პროგრამებზე. „მაგალითად, გოგი მარგველაშვილმა ითხოვა, მაქვს რამდენიმე დარგი, რომლებსაც ახლავე გადავიყვან სამწლიანზე და მოგვეცით უფლება, რომ ჩვენ შიგნითაც განვახორციელოთ სამწლიანი პროგრამებიო. რა თქმა უნდა, ეს მისაღებია ჩვენთვის,“ – ამბობს ბერელიძე.

რაც შეეხება მაგისტრატურას, ერთწლიანი მაგისტრატურის პროგრამით ამ ეტაპზე მხოლოდ ბიზნესის სფეროში დასაქმებულებს შეუძლიათ ისარგებლონ.

„ეს არის ძალიან მაღალი ხარისხის აკადემიური პროგრამა (EMBA), სადაც სწავლა მხოლოდ იმ პირებს შეუძლიათ, ვისაც უკვე აქვს მინიმუმ ხუთწლიანი მუშაობის გამოცდილება აღმასრულებელ პოზიციაზე, რადგან ეს სფერო უფრო მეტად ორიენტირებულია პრაქტიკაზე და ნაკლებად – კვლევაზე. თუმცა ეს მარტო ბიზნესის სფეროს არ მიემართება, არამედ აღსრულებაზე ორიენტირებულ ნებისმიერ სფეროს, მათ შორის ინჟინერიას,“- ამბობს ნინო ბერელიძე.

ერთწლიანი სამაგისტრო პროგრამებდამთავრებული პირების დაშვება დოქტორატურის საფეხურზე ქვეყნების მიხედვით განსხვავებულია.

ნინო ბერელიძის თქმით, განათლების სამინისტრო უკვე მუშაობს უნივერსიტეტების დაფინანსების ახალ მოდელზე, მანამდე კი უნივერსიტეტებს დრო აქვთნ იმუშაონ ახალ საბაკალავრო და სამაგისტრო პროგრამებზე.

„ასევე, უნივერსიტეტები დაადგენენ ჩარიცხვის წინაპირობას, გარდა იმ წესისა, რაც უკვე დადგენილია, ამასობაში კი სამინისტროც შეიმუშავებს დაფინანსების წესს,“ – დასძენს ნინო ბერელიძე.

განათლების მინისტრის ბრძანება საბაკალავრო და სამაგისტრო პროგრამების ერთი წლით შემცირებაზე ძალაში 30 სექტემბერს შევიდა.

_____________________

ფოტო: ბათუმის შოთა რუსთაველის უნივერსიტეტი. ფოტო: „ბათუმელები“

გადაბეჭდვის წესი


ასევე: