1 მოსწავლესაც რომ სჭირდებოდეს, სკოლას აჭარაში ტრანსპორტი დაენიშნება – სამინისტრო


2020 წლიდან აჭარის მაღალმთიან სკოლებს ტრანსპორტით აჭარის განათლების სამინისტრო უზრუნველყოფს, აქამდე ეს პროექტი ცენტრალიზებულად ხორციელდებოდა. ძველი პროექტის მიხედვით, ტრანსპორტით უზრუნველყოფა 176 სკოლას სჭირდება, თუმცა როგორც სამინისტროში „ბათუმელებს“ უთხრეს, ეს ციფრი შესაძლოა გაიზარდოს.

სკოლების ტრანსპორტით უზრუნველყოფისთვის ბიუჯეტიდან 3 მილიონი ლარი გამოიყოფა.

„ძირითადად მაღალმთიანი მუნიციპალიტეტების სკოლებია, სადაც ფეხით გადაადგილდებიან ბავშვები და ზამთრის პერიოდში გადაადგილება ჭირს. დაახლოებით 176 სკოლაზეა ამ დროისთვის საუბარი, თუმცა დეტალების დაზუსტება ოქტომბერში დაიწყება და შესაძლოა რომელიმე სკოლა დაემატოს,“ – ამბობს აჭარის განათლების სამინისტროს განათლების დეპარტამენტის ხელმძღვანელი, ნაზიბროლა ბერიძე-გაბაიძე.

მისივე განმარტებით, ნოემბრის ბოლოს უკვე ეცოდინება სამინისტროს, თუ რომელ სკოლას სჭირდება ტრანსპორტით მომსახურება.

სკოლების ტრანსპორტით უზრუნველყოფისთვის სამინისტრომ ტენდერი უნდა გამოაცხადოს, სადაც გაწერილი იქნება შესყიდვის ტექნიკური დეტალები.

„ტრანსპორტი აუცილებლად უნდა იყოს გამართული, ახალი და მძღოლი უნდა აკმაყოფილებდეს სტანდარტით დადგენილ მოთხოვნებს,“ – ამბობს ნაზიბროლა ბერიძე-გაბაიძე.

მისი თქმით, გადასაყვანი ბავშვების რაოდენობას მნიშვნელობა არ აქვს, ტრანსპორტით მომსახურება შეუძლია მოითხოვოს სკოლამ იმ შემთხვევაშიც, თუკი მომსახურება ერთ მოსწავლეს სჭირდება, „მანძილი თუ არის შორი, ყველა შემთხვევაში დაენიშნება სკოლას ტრანსპორტი“.

ნაზიბროლა ბერიძე-გაბაიძის თქმით, სჭირდება თუ არა სკოლას ტრანსპორტი, ამის შესახებ კვლევას რესურსცენტრები აწარმოებენ: „სკოლა მიმართავს რესურსცენტრს, ის შეისწავლის, თუ რამდენად სამართლიანია მოთხოვნა და შემდეგ სამინისტროში აგზავნის ამ მოთხოვნას. ჩვენ ფაქტობრივად, რესურსცენტრის დასკვნას ვენდობით.“

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com