Batumelebi | აჭარის მთავრობა ბათუმის თევზის ბაზართან მიწას ინვესტორისთვის ამზადებს აჭარის მთავრობა ბათუმის თევზის ბაზართან მიწას ინვესტორისთვის ამზადებს – Batumelebi

აჭარის მთავრობა ბათუმის თევზის ბაზართან მიწას ინვესტორისთვის ამზადებს

გარემოს ეროვნული სააგენტო ბათუმის თევზის ბაზართან ახალი შენობის დაპროექტებას იმის გამო ვერ ახერხებს, რომ ეს ტერიტორია აჭარის მთავრობას ინვესტორისთვის სჭირდება. „მელკი მორიასთან“, ზღვის პირას მდებარე 834 კვ/მეტრი ტერიტორიის მესაკუთრე აჭარის ავტონომიური რესპუბლიკაა. ნაკვეთი უზუფრუქტით არის გადაცემული სააგენტოსთვის.

ტერიტორიაზე დასანგრევია შენობა, რომელშიც ადრე „საქნაპირდაცვა“ იყო განთავსებული. შენობის დემონტაჟისა და ახალი შენობის დაპროექტებაზე გარემოს ეროვნულ სააგენტოს ხელშეკრულება 87 674 ლარზე 19 ივნისს აქვს გაფორმებული. თუმცა, პროექტი შეჩერებულია, ვიდრე აჭარის მთავრობა სააგენტოს ბათუმში სხვა ტერიტორიას არ გამოუყოფს. დოკუმენტებიდან ჩანს, რომ საქმეში ჩართულია ბათუმის მერიც.

„მიწის ნაკვეთის ადგილმონაცვლეობის მიზანია ბათუმში ინვესტიციების შემოდინების პოტენციალის გაძლიერება“, – აღნიშნულია ერთ-ერთ დოკუმენტში:

ამონარიდი გარემოს ეროვნულ სააგენტოსა და ტენდერში გამარჯვებულ კომპანიას შორის დადებული შეთანხმებიდან

კონკურსში გამარჯვებულ შპს „თბილქალაქპროექტს“ ვალდებულების შესრულების ვადის ათვლის დაწყება 2019 წლის 1-ელ ოქტომბრამდე შუეჩერდა. სააგენტოსა და კომპანიას შორის ეს შეთანხმება, ერთი დღით ადრე, 2019 წლის 2 აგვისტოს გაფორმდა. მომდევნო დღეს კომპანიას ტენდერით აღებული ვალდებულება შესრულებული უნდა ჰქონოდა და სააგენტოსთვის სრული დოკუმენტაცია უნდა ჩაებარებინა.

„ბათუმელებმა“ აჭარის მთავრობაში, აჭარის ფინანსთა და ეკონომიკის სამინისტროში და ბათუმის მერიაში ამ დრომდე ვერ გაარკვია, გაცვალეს თუ არა მიწის ნაკვეთი. პასუხი ვერც კონკურსში გამარჯვებული კომპანიიდან მივიღეთ. კითხვაზე არ გვიპასუხა ქონების ეროვნულმა სააგენტომაც, სადაც გვითხრეს, რომ პასუხს იმ შემთხვევაში გვაცნობებენ, თუ საჯარო ინფორმაციას ოფიციალურად, წერილობით გამოვითხოვთ.

საჯარო რეესტრის მონაცემებით კი, თევზის ბაზართან მდებარე ტერიტორია, უზუფრუქტით, კვლავ სააგენტოს სარგებლობაშია.

ესკიზი, რომლის მიხედვითაც „მელკი მორიასთან“ გარემოს ეროვნული სააგენტოს შენობა უნდა დაპროექტებულიყო / ფოტო საკონკურსო დოკუმენტაციიდან

ახალი შენობის საპროექტო-სახარჯთაღრიცხვო დოკუმენტაცია თავდაპირველად კონკურსში გამარჯვებული კომპანია შპს Modern Architectural Group-ს უნდა შეედგინა. თუმცა სააგენტოს დავების საბჭოში უჩივლეს. საბოლოოდ, ეს კონკურსი [სადაც მომსახურების ღირებულება 49 000 ლარი იყო] დასრულდა უარყოფითი შედეგით.

კონკურსი გარემოს ეროვნულმა სააგენტომ ხელახლა 24 აპრილს გამოაცხადა, ამჯერად 74 300 ლარით. სწორედ ამ კონკურსში გამოაცხადეს „თბილქალაქპროექტი“ გამარჯვებულად, რომელთანაც ხელშეკრულება დღგ-ს ჩათვლით, 87 674 ლარზე გაფორმდა.

კონკურსის პირობის მიხედვით, საპროექტო შენობებისა და ეზოს კეთილმოწყობის სამშენებლო სამუშაოების მთლიანი ღირებულება  1 200 000 ლარს [+10% დასაშვებია] არ უნდა აღემატებოდეს.

სააგენტოს ახალი შენობის მშენებლობა ბათუმში დიდი ალბათობით წელს არ დაიწყება. საქართველოს მთავრობას 2019 წლის ბიუჯეტში შეაქვს ცლილებები, ამ ცვლილებების კანონპროექტში კი აღნიშნულია: „სსიპ – გარემოს ეროვნული სააგენტოს მიერ მიმდინარე წელს იგეგმებოდა ბათუმში ლაბორატორიის მშენებლობა, თუმცა ვინაიდან შერჩეული ტერიტორიით დაინტერესდა ინვესტორი, მიმდინარეობს მუშაობა ადგილმონაცვლეობის საკითხზე და მიმდინარე წელს შესაძლებელია 1 მილიონი ლარის გამოთავისუფლება“.

ამ თემაზე:

ბათუმში თევზის ბაზართან გარემოს ეროვნული სააგენტო ახალ შენობას ააშენებს

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com