19-22 სექტემბერს ხულოსა და შუახევის მუნიციპალიტეტებში ლიტერატურული ფესტივალი „ზე-კართან“ გაიმართება.
ფესტივალში მონაწილეობას მიიღებენ იტალიელი, აზერბაიჯანელი და ქართველი მწერლები, გამომცემლები და კარიკატურისტები.
იტალიელი მწერალი დომენიკო პოლიტო, მხატვარი ალესანდრო ალეგრა, აფაგ მესუდა გამომცემელი და მწერალი აზერბაიჯანიდან, მწერალი და მთარგმნელი იმირ მამედლი, ასევე აზერბაიჯანიდან და კარიკატურისტი – კემო საქართველოდან. ასეთია წელს ფესტივალში მონაწილეთა შემადგენლობა.
საფესტივალო დღეებში ჩატარდება საჯარო ლექციები, პოეზიის საღამოები, ლიტერატურულ-თეატრალური პეფორმანსი “ანბანთქება”, ფოლკლორული კონცერტები და გამოფენები. ქართული ლექსების მიხედვით კი, მხატვრები ფერწერულ ტილოებს შექმნიან.
ლიტერატურული ფესტივალი აჭარაში მეშვიდე წელია იმართება. მისი მიზანი თანამედროვე ლიტერატურული პროცესების ხელშეწყობა და აჭარის მაღალმთიანეთის პოპულარიზაცია.
წელს ფესტივალი ანა ლაშხელის ხსოვნას ეძღვნება და მასზე დასწრება თავისუფალია.
