დღეს, 7 სექტემბერს, ბათუმში დილიდან წვიმიანი ამინდია, თუმცა გუშინდელისგან განსხვავებით ქუჩები არ დატბორილა და არც საცობებზე წუწუნებენ სოციალურ ქსელში. მიუხედავად იმისა, რომ გარუჯვის ამინდი არ არის და ზღვაზეც წითელი ალმები ფრიალებს [ეს იმის მანიშნებელია, რომ ზღვაში შესვლა არ შეიძლება], არც პლაჟი დაცარიელებულა და არც ბულვარი. აქ მაინც შეხვდებით ფერად საწვიმარ-ლაბადებში გამოწყობილ ტურისტებს, მათ განსაკუთრებულ ყურადღებას ალი და ნინო იპყრობს.