მოსამართლე ჯუმბერ ბეჟანიძემ 10 ათასი ლარის გადახდა დააკისრა „მეტრო ინტურისტ ბათუმს“. დავის საგანი სარეკლამო ბანერები იყო, რომლებიც კომპანიამ განათავსა სასტუმრო „ინტურისტის“ გარე ფასადზე. სასტუმროს შენობა კულტურული მემკვიდრეობის ძეგლია.
სარეკლამო ბანერების უნებართვოდ განთავსებაზე ადმინისტრაციული სამართალდარღვევის ოქმი „მეტრო ინტურისტ ბათუმს“ აჭარის კულტურული მემკვიდრეობის სააგენტომ 10 ივნისს შეუდგინა. ოქმში აღნიშნულია, რომ სასტუმროს მესაკუთრე გააფრთხილეს, მაგრამ სარეკლამო აბრების დემონტაჟი არ მომხდარა.
„სასტუმრო ინტურისტი“ ცოტა ხნის წინ ასევე 10 ათასი ლარით დააჯარიმა მოსამართლე გოჩა ფუტკარაძემ. სასამართლო დავა ამ შემთხვევაში სასტუმროს ისტორიული ღობის ნაწილობრივ მოშლას ეხებოდა. „მეტრო ინტურისტ ბათუმს“ისტორიული ღობე ამ დრომდე არ აღუდგენია. სასამართლოს გადაწყვეტილება კომპანიამ სააპელაციო წესით გაასაჩივრა.
