ბავშვი, რომელსაც ავარიის შედეგად მშობლები და ძმა დაეღუპა, ნათესავებმა წაიყვანეს

13 ივლისს  მომხდარი ავარიისას დაშავებული 7 წლის გოგონა, რომელსაც მშობლები და პატარა ძმა ავარიის შედეგად დაეღუპა, ნათესავებმა საქართველოდან წაიყვანეს – ინფორმაცია ამის შესახებ „ბათუმელებს“ აჭარის ჯანდაცვის სამინისტროში დაუდასტურეს.

სამინისტროს ინფორმაციით, ბავშვის მდგომარეობა, რომელსაც თავის ტვინის ანოქსიური დაზიანება აღენიშნება, დასტაბილურდა და ნათესავებმა იგი თვითმფრინავით წაიყვანეს სამშობლოში. „ბათუმელების“ ინფორმაციით, ოჯახი საუდის არაბეთიდან ჩამოვიდა საქართველოში დასასვენებლად.

ავარია ქობულეთის შემოვლით გზაზე 13 ივლისს მოხდა. შედეგად დაიღუპა არაბი ცოლ-ქმარი და მათი ექვსი წლის შვილი. ავარიისას სულ დაშავდა 12 ადამიანი – არაბი და პოლონელი ტურისტები და ორი ქართველი მძღოლი.