ბიძინა ივანიშვილმა აჭარის საზოგადოებრივი მაუწყებლის ჟურნალისტს, რომელიც მას კითხვებს უსვამდა შს მინისტრის, გიორგი გახარიას გადადგომაზე, უთხრა: „დაწყნარდით შვილო, ნუ უზრდელობ. როგორ ერთმანეთს გავხართ (იგულისხმა, საზოგადოებრივი მაუწყებელი და რუსთავი 2), გიორგი გახარიამ დაიცვა რუსთავი 2-ის მეპატრონეები, თქვენიც (საზ.მაუწყებლის),“-განაცხადა ივანიშვილმა ჟურნალისტებთან შეხვედრისას ბათუმში, სასტუმრო „ჰილტონში“, სადაც ის პარტიულ შეხვედრას დახურულ ფორმატში მართავდა.
ივანიშვილმა გიორგი გახარიასთან დაკავშირებით განაცხადა, რომ შს მინისტრი არ უნდა გადადგეს. „არც ვაშინგტონიდან, არც ევროპიდან, ვინც ნახა ეს კადრები, (20-21 ივნისის აქციის), არავის კითხვა არ აღეძვრის ძალის ლეგიტიმაციაზე. ლეგიტიმურად იყო ძალა გამოყენებული.
20 ივნისს გახარიას გადადგომა იქნებოდა სამშობლოს ღალატი, რადგან ის ბიჭები, ვინც ორგანიზებას უწევდა აქციებს, უნდოდათ სახელმწიფო გადატრიალება, რა უნდოდათ პარლამენტში? და თუ გახარია გადადგებოდა, შს სამინისტრო აღარ იარსებებდა,“-განაცხადა ივანიშვილმა.
ივანიშვილის „ჰილტონში“ ვიზიტი საპროტესტო აქციის ფონზე მიმდინარეობდა. მას სასტუმროს წინ აქტივისტები პლაკატებით დახვდნენ.
