ხელვაჩაურის სოციალური მომსახურების სააგენტოს ორმა თანამშრომელმა სამსახურში იჩხუბა. ინფორმაციას ამის შესახებ tv 25 ავრცელებს.
ფაქტს „ბათუმელებთან“ ადასტურებს როგორც სააგენტოს ხელმძღვანელი ნანი კახაძე, ასევე შს სამინისტრო, რომელმაც გვითხრა, რომ გამოძიება სსკ-ის კოდექსის 126-ე მუხლით მიმდინარეობს, რაც ფიზიკურ და სიტყვიერ ძალადობას გულისხმობს.
სააგენტოსა და შს სამინისტროში სქესს არ გვიკონკრეტებენ, თუმცა ინფორმირებული პირის თქმით, კოლეგა ქალს კაცმა დაარტყა.
აჭარის სოციალური მომსახურების სააგენტოს უფროსის მოადგილე, რუსუდან სალუქვაძე „ბათუმელებთან“ ამბობს, რომ ჩხუბი თანამშრომლებს შორის პირად საკითხზე დაიწყო.
„როგორც ვიცი, უკმაყოფილება მოუვიდათ, დეტალები არ ვიცი. ჩვენი უფროსი სამსახურში არ არის და როცა გამოვა, დავიწყებთ მოკვლევას.
თუკი გადაწყდება ადმინისტრაციული სასჯელი, ეს ხელვაჩაურის განყოფილების გამგესაც შეუძლია შიდა ბრძანებით, იქნება ეს საყვედური, შენიშვნა თუ გაფრთხილება. მას ასევე შეუძლია მომართოს აჭარის სოციალური მომსახურების სააგენტოს ხელმძღვანელს წერილობით. თუ ძალიან სერიოზული დარღვევაა და თანამშრომლის სამსახურიდან გათავისუფლების საკითხი დადგა, ჩვენ უნდა მივმართოთ სათავო ოფისს,“ – ამბობს რუსუდან სალუქვაძე.
ინციდენტი ხელვაჩაურის სოციალური მომსახურების სააგენტოში დაახლოებით ერთი კვირის წინ მოხდა.
___________________
ფოტოზე: ხელვაჩაურის პოლიცია
