ქობულეთში პარაშუტი პლაჟზე ჩამოვარდა – დაშავდა ორი ადამიანი


ქობულეთის პლაჟზე პარაშუტის გაუმართაობის გამო ორი ადამიანი ჩამოვარდა. შემთხვევა 7 ივლისს მოხდა. პარაშუტი, რომელზეც ორი ადამიანი იყო ჩაბმული, ზღვაზე უნდა დაშვებულიყო, თუმცა პლაჟზე შევარდა, განათების ბოძს გამოედო და ჩამოვარდა.

როგორც ქობულეთის რეფერალურ საავადმყოფოში გვითხრეს, პარაშუტის ჩამოვარდნის შედეგად ორი ქალი დაშავდა, რის შემდეგაც ისინი საავადმყოფოში გადაიყვანეს.

„ჰქონდათ დაზიანებები, მაგრამ სიცოცხლისთვის შეუთავსებელი – არა. თბილისელები იყვნენ, ამიტომ მათი საცხოვრებელი მისამართის მიხედვით გადაიყვანეს,“ – გვითხრეს საავადმყოფოში.

შსს-ს ინფორმაციით, გამოძიება დაწყებულია სსკ-ის 275-ე მუხლით, რაც საჰაერო ტრანსპორტის მოძრაობისა და უსაფრთხოების წესის დარღვევას გულისხმობს.

შემთხვევის შესახებ სამაშველო სამსახურში შეტყობინება ოფიციალურად არ შესულა.

______________________________

ფოტოზე: კადრი ფეისბუქზე გავრცელებული, თვითმხილველის მიერ გადაღებული ვიდეოდან

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com