აჭარის ავტონომიური რესპუბლიკის საავტომობილო გზების დეპარტამენტის მიერ მიმდინარე წელს დაგეგმილი სამუშაოები ყველა მუნიციპალიტეტში გეგმის მიხედვით ტარდება. ახლახანს დასრულდა ბარცხანა-ორთაბათუმი-ზედა ყოროლისთავის საავტომობილო გზის 1,35 კმ სიგრძის მონაკვეთზე ასფალტობეტონის საფარის მოწყობის სამუშაოები. სამუშაოები ამხანაგობა „P&S“-მა შეასრულა. პროექტის ღირებულება 887997 ლარია.
პროექტის ფარგლებში რეაბილიტაცია ჩაუტარდა არსებულ ხიდს, მოეწყო 926 გრძ.მ. რკინაბეტონის კიუვეტი დახურული ცხაურით, 44 გრძივი მეტრი ლითონის მილი და 10220 კვ/მ ასფალტობეტონის საფარი.
რაც შეეხება ხულოს მუნიციპალიტეტში კვატია-ბარდნალის საავტომობილო გზის 0,25 კმ. სიგრძის მონაკვეთს, აქ სარეაბილიტაციო სამუშაოები მიმდინარეობს. პროექტის ფარგლებში უკვე აშენდა 30 მ. სიგრძის ახალი ხიდი. რეაბილიტაციის და ახალი ხიდის მშენებლობის სამუშაოებს შპს „ხელვაჩაურის საგზაო“ ასრულებს.
პროექტის ღირებულება 798 900 ლარია.
მიმდინარე წელს დეპარტამენტის ბიუჯეტიდან საგზაო ინფრასტრუქტურის მშენებლობისთვის 56 671 000 ლარი დაიხარჯება. რეაბილიტაცია ჩაუტარდება და ასფალტობეტონის საფარი მოეწყობა 53,6 კმ. სიგრძის საავტომობილო გზაზე, 114 კმ. სიგრძის საავტომობილო გზაზე მოეწყობა ბეტონის საფარი, აშენდება 15 ახალი ხიდი, რეაბილიტაცია ჩაუტარდება 4 არსებულ ხიდს და მოეწყობა 245 ერთეული ხელოვნური ნაგებობა.
