რუსი მომღერალი ზემფირა ოფიციალურ ვებგვერდზე ეხმიანება „მედუზას“ გამომძიებელი ჟურნალისტის, ივან გოლუნოვის საქმეს. მომღერლის ვებგვერდის მთავარი გვერდი ამჟამად ცარიელია და შავ ფონზე წერია: „თავისუფლება ივან გოლუნოვს“.
მომღერალმა იგივე ფოტო გამოაქვეყნა თავის ოფიციალურ ანგარიშებზე ფეისბუქსა და ინსტაგრამზე.
ივან გოლუნოვი, რომელიც გამოცემა “მედუზას“ გამომძიებელი ჟურნალისტია, მოსკოვში, 6 ივნისს დააკავეს. გოლუნოვის ადვოკატის, დიმიტრი ჯულაის თქმით, მისი დაცვის ქვეშ მყოფს დაკავების შემდეგ ზურგჩანთიდან უცნობი ნივთიერების პაკეტი ამოუღეს. გოლუნოვმა განაცხადა, რომ პაკეტი მას არ ეკუთვნის. კიდევ ერთი შეკვრა და სასწორი გოლუნოვის ბინის ჩხრეკისას ამოიღეს.
გოლუნოვს“დიდი ოდენობით” ნარკოტიკული საშუალების გასაღებას ედავებიან, რასაც ის უარყოფს. ჟურნალისტები და სამოქალაქო აქტივისტები გოლუნოვის დაკავებას მის საქმიანობას უკავშირებენ.
Meduza წერს, რომ დაკავების შემდეგ ჟურნალისტს არ მისცეს ადვოკატთან დაკავშირების უფლება. შემდეგ კი განყოფილებაში სცემეს.
10 ივნისს რუსეთში სამმა გაზეთმა – „კომერსანტმა“, „ვედომოსტიმ“ და „რბკ“- მ გოლუნოვის მხარდასაჭერად იდენტური თავფურცლები დაბეჭდეს. ყდაზე წერია „Я/Мы Иван Голунов“ – „მე/ჩვენ ივან გოლუნოვი ვარ/ვართ“.
Meduza წერს, რომ გამოსვლისთანავე გაზეთების უდიდესი ნაწილი მოსკოვსა და პეტერბურგში გაიყიდა და პრესის ბევრ ჯიხურში გაზეთების მარაგი ამოეწურათ.
სამივე გაზეთის არსებობის ისტორიაში ეს პირველი შემთხვევაა, როდესაც ჟურნალისტის მხარდასაჭერად ერთნაირი თავფურცლები დაბეჭდეს.
