ომარ მახარაძე, რომელიც სტუდენტმა სექსუალურ შევიწროებაში დაადანაშაულა, ბათუმის საკრებულომ დღეს თანამდებობიდან გადააყენა. თანამდებობის დატოვების სურვილი ომარ მახარაძემ თავად გამოთქვა და განცხადებაც დაწერა. ომარ მახარაძე საკრებულოს იურიდიულ და საპროცედურო საკითხთა კომისიის თავმჯდომარე იყო.
დღეს ბათუმის საკრებულომ ცნობად მიიღო ომარ მახარაძის განცხადება, შესაბამისად, ის ბათუმის საკრებულოში თანამდებობაზე აღარ იმუშავებს, თუმცა საკრებულოს წევრად რჩება.
______
სტატია იმის შესახებ, რომ ბათუმის უნივერსიტეტის მეორე კურსის სტუდენტი ლექტორს სექსუალურ შევიწროებაში ადანაშაულებს, „ბათუმელებმა“ 21 მაისს გამოაქვეყნა. 19 წლის სტუდენტი ამბობს, რომ ლექტორი მას ფეისბუქზე წერდა, სთხოვდა თამამ სელფებს და უკომპლექსოდ მოქცევას. ასევე ჰპირდებოდა, რომ ამის შესახებ ვერავინ გაიგებდა.
სტუდენტისგან სექსუალურ შევიწროებაში დადანაშაულებულმა ლექტორმა თქვა, რომ ფეისბუქი გაუტეხეს, თუმცა IT სპეციალისტთან მისვლა ვერ შეძლო.
პოლიციაში გამოკითხვაზე მისულმა ომარ მახარაძემ განაცხადა, რომ ეს ამბავი სინამდვილეს არ შეესაბამება და პროვოკაცია მოუწყეს.
სტუდენტმა განცხადებით მიმართა უნივერსიტეტს და შინაგან საქმეთა სამინისტროსაც. შსს-მ გამოძიება საქართველოს სისხლის სამართლის კოდექსის 150-ე მუხლით დაიწყო, რაც იძულებას გულისხმობს და ისჯება ჯარიმით ან გამასწორებელი სამუშაოთი ვადით ერთ წლამდე ან იმავე ვადით თავისუფლების აღკვეთით.
22 მაისს, კი ცნობილი გახდა, რომ ბათუმის შოთა რუსთაველის სახელობის სახელმწიფო უნივერსიტეტის ლექტორს, რომელსაც სტუდენტი სექსუალურ შევიწროებაში ადანაშაულებს, უნივერსიტეტმა ლექტორის სტატუსი დროებით შეუჩერა.
