ხელვაჩაურის რაიონული სასამართლოს მოსამართლემ, დავით გელაშვილმა, ჯგუფურ ქურდობაში ბრალდებულები გაამართლა. ამ საქმეში მთავარი მოწმე ტაქსის მძღოლი იყო, რომელმაც მოსამართლეს უთხრა, რომ მას პოლიციელებმა ჩვენების მიცემა აიძულეს.
შემთხვევა რამდენიმე თვის წინ ხელვაჩაურში, სოფელ ერგეში მოხდა. გამოძიების ვერსიით, სოფლის ცენტრში მდებარე მაღაზია ევგენი გ.-მ და დათო გ.-მ გატეხეს. მაღაზიიდან იმ ღამით 1300 ლარის ღირებულების საკვები პროდუქტი წაიღეს, 300 ლარი და მუსიკალური ცენტრი. რამდენიმე დღეში სამართალდამცველებმა ბრალდებულების დაკავება მას შემდეგ გადაწყვიტეს, როცა ერთ-ერთი ბრალდებულის ბიძაშვილის სახლში მუსიკალური ცენტრი იპოვეს. გამოძიებამ მოპარულ საკვებს ვერ მიაგნო.
„სასამართლოს ბრალდებულის ბიძაშვილმა უთხრა, რომ მუსიკალური ცენტრი იაფად იყიდებოდა და შეიძინა… მოწმე იყო ტაქსის მძღოლი, რომელმაც გამოძიების ეტაპზე ბრალდებულები ამოიცნო, სასამართლოში კი თქვა, რომ პოლიციელებმა მცემეს და მაიძულეს ეს მეთქვა, მამაჩემსაც დავადებდი ხელსო. ამაზე პროკურატურამ უნდა დაიწყოს გამოძიება, თუ იყო მასზე ზეწოლა…“ – ამბობს ადვოკატი ზაზა პაპიძე.
ბრალდებულები ამ დროისთვის თურქეთში არიან. ადვოკატის თქმით, ისინი იქ სამუშაოდ წავიდნენ და გამოძიებამ მათი დაკავება ვერ მოასწრო. ბრალდებულებზე ამ დრომდე ძებნა იყო გამოცხადებული.
ბრალის დადასტურების შემთხვევაში, ევგენი გ.-ს და დათო გ.-ს 4-დან 7 წლამდე თავისუფლების აღკვეთა ელოდათ.
