მთავარი,სიახლეები

„ბლექ სი არენა“ კონცერტებისთვის წელს 6,5 მილიონ ლარს ტენდერის გარეშე დახარჯავს

22.04.2019 • 2564
„ბლექ სი არენა“ კონცერტებისთვის წელს 6,5 მილიონ ლარს ტენდერის გარეშე დახარჯავს

„ბლექ სი არენა ჯორჯია“ 2019 წლის საკურორტო სეზონის განმავლობაში სხვადასხვა კონცერტსა და ღონისძიების ჩატარებისთვის ბიუჯეტიდან 6,5 მილიონ ლარს ტენდერის გარეშე დახარჯავს. ღონისძიებები სახელმწიფო პროექტ Check In Georgia-ს ფარგლებში ჩატარდება.

„კონტრაქტი უნდა გაფორმდეს ადგილობრივი შემსრულებლებისა და მსოფლიოში აღიარებული ვარსკვლავური მუსიკალური ჯგუფების, არტისტების და ელექტრონული მუსიკის შემსრულებლების [DJ] პროვაიდერ სააგენტოებთან. ასეთი სააგენტოები კი არ არიან დაინტერესებული ტენდერში მონაწილეობის მიღებით. ასევე ამ ყველაფერს აფერხებს ის ფაქტი, რომ უმეტესობას დაგეგმილი აქვთ ტურნე და თარიღის განსაზღვრა ხდება მათ მიერ. შესყიდვის სპეციფიკიდან გამომდინარე შეუძლებელია ზემოაღნიშნული შესყიდვის გამარტივებული ელექტრონული ტენდერის ან ელექტრონული ტენდერის მეშვეობით შესყიდვა“ – აღნიშნულია „ბლექ სი არენა ჯორჯიას“ განცხადებაში, რომლითაც შესყიდვების სააგენტოს მიმართა.

სააგენტომ თანხის ტენდერის გარეშე დახარჯვაზე თანხმობა „ბლექ სი არენას“  უკვე მისცა.

„ბლექ სი არენა ჯორჯიას“ განაცხადის მიხედვით ღონისძიებების ჩატარების პერიოდი განისაზღვრება 2019 წლის ივნისიდან 2019 წლის ოქტომბრის ჩათვლით. 6,5 მილიონი ლარი კი წინასწარი გათვლებით შემდეგნაირად დაიხარჯება:

[checklist]

  • 4,5 მილიონი ლარი – შემსრულებლების ჰონორარში;
  • 2 მილიონი ლარი – ღონისძიებების ორგანიზებისთვის საჭირო შესყიდვებისთვის.

[/checklist]

„ბლექ სი არენა ჯორჯია“ არის სახელმწიფო შპს, რომლის 100% წილის მმართველი საქართველოს განათლების, მეცნიერების,
კულტურისა და სპორტის სამინისტროა. საკონცერტო დარბაზი კი ოზურგეთის სოფელ შეკვეთილში მდებარეობს.

 

გადაბეჭდვის წესი


ასევე: