Batumelebi | 5 დღეში გონიოსა და კვარიათის პლაჟებზე ბუნგალო აღარ უნდა იყოს 5 დღეში გონიოსა და კვარიათის პლაჟებზე ბუნგალო აღარ უნდა იყოს – Batumelebi

5 დღეში გონიოსა და კვარიათის პლაჟებზე ბუნგალო აღარ უნდა იყოს

ხუთ დღეში გონიოსა და კვარიათის პლაჟებზე ბუნგალოები აღარ უნდა იყოს. ვიდრე ბათუმის მერია ახალი ბუნგალოების და კაფე-ბარების მოსაწყობად აუქციონს გამოაცხადებს, ძველმა მესაკუთრეებმა ბუნგალოები უნდა დაშალონ. დღეს, 13 მარტს, ბათუმის მერიის თანამშრომლებმა გონიოსა და კვარიათში ბუნგალოების მესაკუთრეების გაფრთხილება დაიწყეს.

მერიის გაფრთხილების წერილში აღნიშნულია ისიც, რომ თუკი ხუთ დღეში მესაკუთრე ბუნგალოს არ დაშლის, მერია პასუხისმგებლობას იხსნის სადემონტაჟო ობიექტში არსებული ქონების დაზიანებაზე. „ამასთანავე, თქვენ მიმართ გატარდება კანონმდებლობით გათვალისწინებული ღონისძიებები,“ – წერია გაფრთხილებაში.

ბათუმის მერიის პრესცენტრის ინფორმაციით, მესაკუთრე 1000-დან 2 000 ლარამდე დაჯარიმდება, თუკი ის თავისი ნებით ბუნგალოს არ დაშლის. ამ ეტაპზე გაფრთხილება გონიოსა და კვარიათის სანაპირო ზოლზე არსებულ ყველა ობიექტს ეხება, რადგან სანებართვო ვადა უკვე ამოიწურა.

 

ფოტო: ბათუმის მერია

 

ნეტგაზეთის მასალების სხვა გამოცემებში გადაბეჭდვის წესი
ავტორი