Batumelebi | რატომ მოდის მღვრიე წყალი ონკანში – „ბათუმის წყლის“ განმარტება რატომ მოდის მღვრიე წყალი ონკანში – „ბათუმის წყლის“ განმარტება – Batumelebi
RU | GE  

რატომ მოდის მღვრიე წყალი ონკანში – „ბათუმის წყლის“ განმარტება

ბათუმის ზოგიერთ უბანში ონკანში მღვრიე წყალი მოდის. წყალს დაჰყვება სპეციფიკური გემოც. „ბათუმელები“ მიზეზების დასადგენად „ბათუმის წყალს“ დაუკავშირდა.

„ბათუმის წყლის“ პრესსამსახურის განმარტებით, წყლის ამღვრევა  წყალმომარაგების ერთ-ერთ მილზე გაწმენდითი სამუშაოების ჩატარებამ გამოიწვია.

„წყალმომარაგების მილზე მიმდინარეობდა სარემონტო სამუშაოები ღამის საათებში. ე.წ. ჭაობის დასახლებაში იყო ეს სამუშაოები და მთელი ღამის განმავლობაში გრძელდებოდა.

სასმელი წყალი ონკანიდან. ფოტო: „ბათუმელები“

ამის შემდეგ მილები გაირეცხა, გაიწმინდა, თუმცა, ამის მიუხედავად, წყალმომარაგების სისტემაში წყალი აიმღვრა მოსახლეობაზე მიწოდების დროს. ონკანის რამდენიმეწუთიანი გაღება საკმარისია იმისთვის, რომ წყალმომარაგების სისტემიდან ამღვრეული წყალი გამოვიდეს,“- გვითხრეს „ბათუმის წყლის“ პრესსამსახურში.

პრესსამსახურის განმარტებით, მოსახლეობას შეუძლია დარეკოს, ლაბორატორიის წარმომადგენლები მივლენ ადგილზე და აიღებენ წყლის სინჯებს.

ნალექი სასმელ წყალში. ფოტო: „ბათუმელები“.

„ბათუმის წყალში“ გვითხეს, რომ ტექნიკური სამუშაოები უკვე დასრულდა, თუმცა სამუშაოების დაწყებასთან დაკავშირებით კომპანიას მოსახლეობა არ გაუფრთხილებია.

„ბათუმის წყალთან“ დაკავშირება დაინტერესებულ პირებს შეუძლიათ აღნიშნულ ნომერზე: 0422 24 22 22

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com