ეკა ბესელია: დაკავებულებს შეიძლება არც კი ჰქონდათ გააზრებული ისე აზიარებდნენ ჩანაწერს


საქართველოს პარლამენტის დეპუტატმა ეკა ბესელიამ შს სამინისტროს მაღალჩინოსნებთან შეხვედრის შემდეგ ჟურნალისტებთან კომენტარი გააკეთა. დღეს შს სამინისტრომ პირადი ცხოვრების ამსახველი ვიდეოჩანაწერის შენახვის და გავრცელების ბრალდებით 16 პირის დაკავების შესახებ გაავრცელა ინფორმაცია. ეკა ბესელიას სავარაუდო პირადი ცხოვრების კადრების ბოლო დღეების განმავლობაში რამდენჯერმე გავრცელდა.

ეკა ბესელია: „ამ დროისთვის რა ინფორმაციაც მივიღე, დაკავებულია რამდენიმე ადამიანი. საგამოძიებო მოქმედებები მიმდინარეობს. რამდენიმე პირი დაკავებულია, რომლებსაც სწორედ შეიძლება არც კი ჰქონდათ გააზრებული და ისე ახორციელებდნენ ამ ჩანაწერის ან გაზიარებას ან შენახვას. თუმცა არიან ადამიანები, რომელთა მიმართ მიმდინარეობს გადამოწმება მათი პოლიტიკური კავშირების თვალსაზრისით. ამაზე გამოძიება ისაუბრებს და მე არ მინდა მოვლენებს წინ გავუსწრო…

არ გამოვრიცხავ, იმ ჯგუფს, რომელიც არის სასამართლოს შიგნით, რომელთა წინააღმდეგაც ჩვენ გადავდგით ძალიან პრინციპული ნაბიჯები და ასევე მათთან დაკავშირებული პირები… გამორიცხვით, ამას ვერ გამოვრიცხავ. მე ბრალს არავის არ ვდებ, იმიტომ რომ არ დავარღვევ პრეზუმფციას, გამოძიებას დავუცდი“ – განაცხადა ეკა ბესელიამ.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com