მე-12 კლასის გამოცდები შეიძლება გაუქმდეს


საქართველოს განათლების მინისტრზე დაყრდნობით საზოგადოებრივი მაუწყებელი ავრცელებს ინფორმაციას, რომ შესაძლოა მე-12 კლასის მოსწავლეებისთვის გამოცდები წელსვე გაუქმდეს.

მიხეილ ბატიაშვილის განმარტებით, ამ საკითხზე ინტენსიურად მუშაობენ. განათლების სამინისტრომ გასულ კვირას განაცხადა, რომ წელსვე უქმდება საატესტატო გამოცდები ყველასთვის, გარდა მე-12 კლასისა. ეს ფაქტი გააპროტესტეს მეთორმეტეკლასელებმა, რამდენიმე აქცია გამოცდების გაუქმების მოთხოვნით ბათუმშიც გაიმართა.

დღეს განათლების მინისტრმა მე-12 კლასის გამოცდებთან დაკავშირებით საზოგადოებრივ მაუწყებელს განუცხადა, რომ ამ საკითხზე კონსულტაციებს გადიან: „ეს მოითხოვს ბევრ საკანონმდებლო ცვლილებას. ამის შესახებ გადაწყვეტილებას ძალიან მალე მივიღებთ ყველა რისკისა და ყველა მხარესთან კონსულტაციის გათვალისწინებით, იქნებიან სკოლები, ექსპერტები თუ საკანონმდებლო ორგანო. ვფიქრობთ, გადაწყვეტილება სწორედ განათლების ხარისხზე იქნება ორიენტირებული“.

განათლების სამინისტროს დაანონსებულ ცვლილებებს გამოეხმაურა საქართველოს პარლამენტში განათლების, მეცნიერებისა და კულტურის კომიტეტის თავმჯდომარე მარიამ ჯაშიც. მისი აზრით, „მეთერთმეტეკლასელებისთვის გამოსაშვები გამოცდები თუ უქმდება, არათანაბარ პირობებში ვაყენებთ მე-12- კლასელებს…“

სფეროს ექსპერტებს მიაჩნდათ, რომ მოსალოდნელი ცვლილებები [მე-11 კლასის გამოცდების გაუქმება] არის ნაჩქარევი და ამ გადაწყვეტილების მიღებამდე სფეროში დასაქმებულებთან თუ სპეციალისტებთან სამინისტროს კონსულტაცია უნდა გაევლო.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.