ბათუმში, ოპიზრების ქუჩაზე მცხოვრები ადამიანები ხელისუფლების ყურადღებას ითხოვენ. ამ ქუჩაზე თვითნებურად შესახლებული ოჯახები შემოვლითი გზის მშენებლობას აპროტესტებენ, რაც ადგილზე ცხოვრებას გაუსაძლისს და დაუცველს ხდის.
„14 ოჯახი ვართ ამ ქუჩაზე და 20 ბავშვია ზუსტად. უსაფრთხოების ზომები არის სრულიად დაუცველი. ნებისმიერ დროს შეიძლება მძიმე ტექნიკამ ჩვენი პატარები დააზიანოს. ბავშვებს არც სხვა ადგილი აქვთ სათამაშოდ, ქუჩაც ატალახებულია. ტექნიკა მეათე დღეა აქტიურად მუშაობს და გაუსაძლისი მტვერი და ხმაურია. იქნებ გაგვაგებინოს ვინმემ, მაგისტრალის ზონაში ვართ თუ არა და რა გველის. ჩვენ უკვე მერვე წელია აქ ვცხოვრობთ,“ – გვითხრა დარეჯან მორთულაძემ.
აჭარის მთავრობაში წერილობით განცხადება მხოლოდ აჭარის ფინანსთა და ეკონომიკის სამინისტრომ გაავრცელა:
„ოპიზრების დასახლების მოსახლეობას დღეს ჯანდაცვის მინისტრის მოადგილე შეხვდა და ადგილზე გაეცნო ვითარებას. მოხდება აღნიშნული საკითხის დეტალური შესწავლა და მიღებული იქნება კანონით გათვალისწინებული გადაწყვეტილება“, – განაცხადეს აჭარის ფინანსთა და ეკონომიკის სამინისტროში.
