ბათუმის ცენტრალურ პარკში ნურის ტბის დაჭაობების რისკების შესამცირებლად წყლის სპეციალური ტუმბო დაამონტაჟეს. შპს “ბათუმის წყალში” ამბობენ, რომ ამ მოწყობილობით ტბიდან წყლის ამოტუმბვა და მისი სანიაღვრე არხში უსაფრთხოდ ჩაშვება გარემოს ეროვნული სააგენტოს მიერ გაცემული რეკომენდაციაა. წყლის ამოტუმბვის მიზანი ტბისთვის სიცოცხლისუნარიანობის დაბრუნებაა.
„შესაძლოა ტბიდან წყლის ამოტუმბვის შედეგად მოხდეს წყალგანახლების პროცესის ფორსირება, რომ მიწისქვეშა წყლების ხარჯზე მოხდეს წყალგანახლება და ამ ტბაში სიცოცხლისუნარიანობა განახლდეს,” – გვითხრეს “ბათუმის წყალში”.
სპეციალური სატუმბი საშუალება ტბაზე დაახლოებით სამი კვირაა მუშაობს. დაკვირვების პროცესი შესაძლოა კიდევ ორ თვეს გაგრძელდეს. „პროცესზე დაკვირვების შემდეგ თუ აღმოჩნდება, რომ ეს არის ის საშუალება, რომელიც ტბაში არსებულ პროცესს გააჯანსაღებს, აშენდება მინიტუმბო ტბასთან, რომელიც რეგულარულად გადატუმბავს წყალს სანიაღვრე არხში,” – ამბობს “ბათუმის წყლის” პრესსამსახურის უფროსი ელენე ნოღადელი.
ნურის ტბაში უჟანგბადობის პრობლემა რამდენიმე წლის წინ დაიწყო, როცა ტბაში ციანობაქტერია მომრავლდა და შემდეგ ლპობა დაიწყო. ამის გამო ტბაში პერიოდულად იხოცებოდნენ თევზები და პარკის ტერიტორიაზე მძაფრი უსიამოვნო სუნიც იგრძნობოდა.
ტბაში ციანობაქტერიების მატების მთავარ მიზეზად სპეციალისტებმა ტბასა და ზღვას შორის შეწყვეტილი წყლის მიმოქცევა დაასახელეს. ორი წლის წინ წყალში ჟანგბადის შემცველობის დასარეგულირებლად ტბაში აერაციის სისტემა დამონტაჟდა, რის შედეგადაც ჟანგბადის მაჩვენებელი მასში დაახლოებით 5-ჯერ გაიზარდა.
სატუმბი აპარატი “ბათუმის წყლის” საკუთრებაა, მის შესაძენად ბიუჯეტიდან თანხა არ დახარჯულა.
ნურიგელის ტბაში ციანობაქტერიები კვლავ მომრავლდა [ფოტო/ვიდეო]
