დღეს, 31 ოქტომბერს, ბათუმის საკრებულოს სხდომა გაიმართა, სადაც საკრებულოს წევრებმა 28 ოქტომბერს ჩატარებული საპრეზიდენტო არჩევნების შედეგებზე კომენტარი გააკეთეს.
ენმ-ს წარმომადგენელმა მირდატ ქამადაძემ განაცხადა, რომ გაერთიანების დროა.
„ამ ქვეყანაში მნიშვნელოვანი დრო დგება, როდესაც ყველამ ერთად, მიუხედავად პოლიტიკური შეხედულებებისა, ერთად უნდა ვაკეთოთ ქვეყნის საქმე. დროა, ძალიან დიდი გაერთიანებისa და ეროვნული შერიგების.
როგორც რეიგანი ამბობდა, ვერასდროს გაიმარჯვებს ბოროტება, როდესაც სიკეთე ძლიერია. მე მგონია, რომ ჩვენს ქვეყანაში სიკეთე ძლიერია და თუ შევძლებთ ყველა ერთად დგომას ხელიხელჩაკიდებული, ამ ქვეყნისთვის დიდ საქმეს გავაკეთებთ“.
მირდატ ქამადაძეს საკრებულოს უმრავლესობის წევრი ნატალია ზოიძე გამოეხმაურა: „ცოტა ვერ გავარკვიე ბოროტება და სიკეთე რა შუაში იყო, თუ გავითვალისწინებთ მეთოდებს, რომლითაც „ქართული ოცნება“ ხელმძღვანელობს და მეთოდებს, რომლითაც „ნაციონალური მოძრაობა“ ხელმძღვანელობდა, კარგად ჩანს, სადაა ბოროტება და სადაა სიკეთე“.
ენმ-ის სხვა წარმომადგენელმა, ლევან ანთაძემ დააზუსტა, რომ მირდატ ქამადაძემ ბოროტებაში რუსეთი იგულისხმა და არა „ქართული ოცნება“.
ლევან ანთაძემ სხდომაზე ასევე განაცხადა, რომ ზეწოლის მიუხედავად, საკრებულოს წევრებმა „სწორი არჩევანი გააკეთეს, მიუხედავად იმისა, რომ ცდილობდნენ ცხვრებივით მიეყვანათ არჩევნებზე“ და მათ მადლობა გადაუხადა.
ანთაძეს რეპლიკით უპასუხა საკრებულოს თავმჯდომარემ, სულიკო თებიძემ: „ცხვრებივით მიყვანის ხანა დამთავრდა 2012 წელს“.
უმრავლესობის წევრმა ომარ მახარაძემ ლევან ანთაძეს ჰკითხა: „გასაგებია, რომ რუსეთის სახით ძალიან დიდი მტერი გვყავს, მაგრამ თქვენი პრეზიდენტობის კანდიდატის პიარმენეჯერები ვინ გყავთ?“ – რაზეც ანთაძემ უპასუხა, რომ „თქვენ (ანუ „ქართულ ოცნებას“) კოსაჩოვი (რუსეთის ფედერაციის საბჭოს საერთაშორისო კომიტეტის ხელმძღვანელი) გყავთ და რაზე ლაპარაკობთ“.
ამის შემდეგ, საკრებულოს თავმჯდომარემ მათ დისკუსიის შეწყვეტისკენ მოუწოდა.
