როდის დაიწყება ბათუმის ახალი ნაგავსაყრელის მშენებლობა, ამ დრომდე გაურკვეველია. კომპანიაში „ჰიგიენა 2009“, რომელიც შესაბამის პროექტს კურირებს, მშენებლობის დაწყებას 2018 წლის სექტემბერში ვარაუდობდნენ, თუმცა დღეის მდგომარეობით, მშენებელი კომპანიაც კი არ არის გამოვლენილი.
აჭარის მყარი ნარჩენების პროექტზე მუშაობა 2010 წელს დაიწყო, თუმცა 7 მილიონი ევრო სესხის და გრანტის აუთვისებლობის გამო სახელმწიფო მხოლოდ ვალდებულების საკომისიოს იხდის.
„მიმდინარე წლის ზაფხულში გადავაგზავნეთ პოლონური და თურქული კომპანიების ბოლო ფინანსური ანგარიშები და საბანკო გარანტიები ევროპის რეკონსტრუქციისა და განვითარების ბანკში [EBRD]. მანამდე გადაგზავნილი გვქონდა ტექნიკური, საინჟინრო და დიზაინის მონაცემები. მშენებლობის დასაწყებად ახლა მთავარია ამ ორიდან ერთ-ერთ კომპანიაზე მოგვცენ დასტური“, – ამბობს „ბათუმელებთან“ გია ხალვაში, აჭარის ფინანსთა და ეკონომიკის სამინისტროს მიერ დაფუძნებული კომპანია „ჰიგიენა 2009“-ს დირექტორი.
7 მილიონი ევროდან, რაც ნაგავსაყრელის პროექტს უნდა მოხმარდეს, 3 მილიონი ევრო EBRD-ის სესხია, ხოლო 4 მილიონი ევრო – შვედეთის სახელმწიფოს გრანტი.
„ეს კონტრაქტი გაფორმებულია 2010 წელს და საჭიროა განახლება. საქართველოს ფინანსთა სამინისტრომ თავიდან უნდა მოაწეროს ხელი დოკუმენტებს EBRD-თან – კრედიტზე, შვედურ მხარესთან კი – საგრანტოზე. ქართულ მხარეს ყველაფერი მზად გვაქვს და ველოდებით ინფორმაციას მათი მხრიდან. დონორები ერთმანეთში არკვევენ ალბათ საკითხებს და ამას მიაქვს დრო,“ – ამბობს გია ხალვაში.
მისივე თქმით, ჰქონდათ მოლოდინი, რომ „თანხმობას მივიღებდით და დავიწყებდით მშენებლობას 2018-ში, მაგრამ არ მოგვდის თანხმობა. თავად აფასებენ და ამოწმებენ კომპანიების შეთავაზებებს, ფასებს, წინადადებებს, ჩვენ ამ პროცესში არ ვერევით. ნაგავსაყრელის მშენებლობა მას შემდეგ დაიწყება, რაც მივიღებთ EBRD-ისგან თანხმობას ერთ-ერთ კომპანიაზე, რომელთანაც გავაფორმებთ შესაბამის ხელშეკრულებას“.
გია ხალვაშის ინფორმაციით, ახალი ნაგავსაყრელი დასაწყისში მხოლოდ არასახიფათო ნარჩენებს მიიღებს: „შემდეგ, დანადგარებს თუ შევიძენთ და ასე შემდეგ მერე შეძლებს ნაგავსაყრელი სახიფათო ნარჩენების მიღებას. ეს ყველაფერი ფინანსებზეა დამოკიდებული და იმაზე, ამ კუთხით თუ შეგვიწყობენ ხელს დონორები“.
ახალი ნაგავსაყრელი ქობულეთის სოფელ ცეცხლაურში უნდა აშენდეს.
———–
სახელმწიფო აუდიტის დასკვნაში აღნიშნულია, რომ 2019 წლის სახელმწიფო ბიუჯეტის კანონის პროექტით დაფინანსება ეზრდება ისეთ საინვესტიციო პროექტებს, რომელთა შესრულება 2018 წლის 8 თვის მდგომარეობით 9 თვის გეგმასთან მიმართებაში 50%-ზე დაბალია. ამასთან, „განსაკუთრებით საყურადღებოა ისეთი პროექტები, რომელთა ფარგლებშიც საერთოდ არ მომხდარა თანხების ათვისება როგორც 2017, ასევე 2018 წლის განმავლობაში,“ – აცხადებს აუდიტი. ასეთ პროექტებს შორისაა აჭარის მყარი ნარჩენების პროექტიც.
„კრედიტის სახით გამოყოფილი სახსრების დაგვიანებით ათვისება იწვევს სესხის მომსახურების ხარჯების ზრდას, რადგან კონტრაქტების ნაწილი ითვალისწინებს მსესხებლისთვის ვალდებულების გადასახადის (Commitment Fee) დაკისრებას სესხის აუთვისებელ ნაწილზე. მაგალითად, 2018 წლის 8 თვის მდგომარეობით, ქვეყნის მასშტაბით ასეთი დაბალი ათვისების პროექტების შემთხვევაში, სულ გადახდილია 1,5 მლნ ლარის მოცულობის ვალდებულების გადასახადი“ – აღნიშნულია აუდიტის დასკვნაში. – „შესაბამისად, მნიშვნელოვანია პროექტის განმახორციელებელმა უწყებებმა უზრუნველყონ გამოყოფილი სესხების დროული და ეფექტიანი ათვისება; ასევე, აღნიშნული პროექტების მომავალი წლის გეგმის განსაზღვრისას გაითვალისწინონ პროექტების მიმდინარე შესრულების მდგომარეობა, რათა თავიდან იქნეს აცილებული სესხზე ვალდებულების გადასახადით გაწეული დამატებითი ხარჯებისა და დროში გაწელილი ან/და დაუსრულებელი პროექტების რაოდენობის ზრდა“.
ამ თემაზე:
„ჰიგიენა 2009“-დან 5 მილიონის მითვისების შემდეგ დირექტორი მეორედ შეცვალეს
