განათლება,მთავარი,სიახლეები

 „ერაზმუს+“: პროგრამა 6 მილიონი ევროთი გაიზარდა, გაცვლითი პროგრამებით 800-მდე პირი ისარგებლებს

19.10.2018 • 7128
 „ერაზმუს+“: პროგრამა 6 მილიონი ევროთი გაიზარდა, გაცვლითი პროგრამებით 800-მდე პირი ისარგებლებს

„ერაზმუს +“ საგანმანათლებლო საგრანტო პროგრამის ბიუჯეტი საქართველოსთვის 6 მილიონი ევროთი გაიზარდა. ეს თანხა ევროკავშირმა საქართველოს სპეციალურად გამოუყო 2018-2020 წლებისთვის. მომდევნო ორ წელში საქართველოს დამატებით 800-მდე სასტიპენდიო გაცვლის საშუალება მიეცემა.

„ერაზმუს+“ საგრანტო პროგრამის მენეჯერი ნინო ურუშაძე „ბათუმელებთან“ ამბობს, რომ საგრანტო პროგრამა ქართველ სტუდენტებს და აკადემიურ პერსონალს შესაძლებლობას აძლევს, 33 ევროპული ქვეყნის უნივერსიტეტებში სასტიპენდიო პროგრამით ისარგებლონ.

თანხა გადანაწილდება სამ ძირითად პროგრამაზე:

ჟან მონე (Jean Monnet), უმაღლესი განათლების შესაძლებლობების გავრცობა-განვითარება (CBHE) და ინდივიდუალური სასწავლო მობილობა (ICM), რომელზეც ყველაზე მეტი, – 3.5 მილიონი ევროა გამოიყოფა. ეს ნიშნავს, რომ

„ერაზმუს+“ საგრანტო პროგრამაში ბათუმის შოთა რუსთაველის სახელმწიფო უნივერსიტეტი რამდენიმე წელია რაც ჩართულია. როგორც რექტორის მოადგილე ნათია წიკლაშვილი „ბათუმელებთან“ ამბობს, ამ ეტაპზე გამოცხადებულია კონკურსი როგორც სტუდენტებისთვის, ასევე აკადემიური პერსონალისთვის, „ასევე ვცდილობთ, ახალი კონტაქტების მოძიებას.“

ნათია წიკლაშვილის თქმით, 2018 წელს ბსუ-მ მემორანდუმი გააფორმა ვარნას [ბულგარეთი] უნივერსიტეტთან, ასევე უკრაინის რამდენიმე უნივერსიტეტთან:

„კვლევის შემთხვევაში აქცენტს ვაკეთებთ საბუნებისმეტყველო და ჰუმანიტარულ მიმართულებებზე. მაგრამ სტუდენტების გაცვლითი პროგრამების შემთხვევაში ნებისმიერ მიმართულებაზე, რომელიც ჩვენთან ისწავლება“.

როგორც წიკლაშვილი ამბობს, სტუდენტებს, ძირითადად მაინც, მიმღები უნივერსიტეტები არჩევენ: „დღეს მიმდინარეობს, მაგალითად, ტესტირება ინგლისურ ენაში და ვნახოთ რამდენი სტუდენტი შეირჩევა. დაახლოებით 10-15 სტუდენტი შეიძლება წავიდეს. ჩვენ გვაქვს ჩვენი კვოტა, თუმცა კონკურსის შემთხვევაში ადგილები ნაწილდება საქართველოს მასშტაბით და შეიძლება ეს კვოტა შეიცვალოს“.

ამჟამად 16 უნივერსიტეტზეა კონკურსი გამოცხადებული. მიმდინარე კონკურსში, როგორც წიკლაშვილი ამბობს, მონაწილეობენ ეკონომიკის, ბიზნესის ადმინისტრირების, მათემატიკის, ელექტრო და მექანიკური ინჟინერიის, განათლების, საინფორმაციო ტექნოლოგიების, ჯანდაცვის, ლინგვისტიკის, სამართალმცოდნეობის, პოლიტიკური მეცნიერებების და სხვა სპეციალობების სტუდენტები.

„არის კიდევ პორტუგალიის ორი უნივერსიტეტი, სადაც კონკრეტულ მიმართულებას არ აქვს მათთვის მნიშვნელობა და ყველა თანხვედრი მიმართულების სტუდენტები შეიძლება გავცვალოთ“.

კონკურსში მონაწილე უნივერსიტეტებიდან ერთი თურქულია, დანარჩენი ევროპული ქვეყნების უნივერსიტეტებია.

„ერაზმუს + ფარგლებში თურქეთის მხოლოდ ერთ უნივერსიტეტთან ვთანამშრომლობთ, თუმცა თურქეთის სხვა უნივერსიტეტებთან ცალკე გვაქვს თანამშრომლობა ყველა მიმართულებებთან“, – ამბობს ნათია წიკლაშვილი.

„ერაზმუს+“ საგრანტო პროგრამის მენეჯერის ნინო ურუშაძის თქმით,„პროგრამა ღიაა და ყველა უნივერსიტეტს აძლევს შესაძლებლობას, ჩაერთოს. ვინც მეტად იაქტიურებს, იმას მიეცემა მეტი სტიპენდია. მათ უნდა შეძლონ ევროპელ პარტნიორებთან ხელშეკრულების გაფორმება და ამის ფარგლებში გაიცემა სტიპენდიები. თითო ხელშეკრულება ერთწლიანი იქნება და აქ უნდა გაიწეროს რამდენ სტუდენტზე ან აკადემიურ პერსონალზე სურთ მობილობის განხორციელება“.

 

გადაბეჭდვის წესი


ასევე: