Batumelebi | კ2 კოეფიციენტის ახალი საბჭო მშენებლობის სიმაღლეში გაზრდაზე 24 კომპანიას დაეთანხმა კ2 კოეფიციენტის ახალი საბჭო მშენებლობის სიმაღლეში გაზრდაზე 24 კომპანიას დაეთანხმა – Batumelebi
RU | GE  

კ2 კოეფიციენტის ახალი საბჭო მშენებლობის სიმაღლეში გაზრდაზე 24 კომპანიას დაეთანხმა

ადლიისა და ანგისის დასახლებაში, ასევე გენერალ ასლან აბაშიძის ქუჩაზე და ბათუმის შემოერთებულ ტერიტორიაზე 24 სამშენებლო კომპანიას ბათუმის მერია k2 კოეფიციენტის გაზრდაზე დაეთანხმა, თითქმის ამდენივე კომპანიას კი უარი უთხრეს. k-2 კოეფიციენტი გულისხმობს დაგეგმილი სამშენებლო პროექტის გაზრდას სიმაღლეში. შესაბამს საბჭოს მერიაში ბათუმის ვიცე-მერი თენგიზ პეტრიძე ხელმძღვანელობს.

მას შემდეგ, რაც დაგეგმილი ან მიმდინარე სამშენებლო პროექტის განაშენიანების ინტესივობის კოეფიციენტის [k2] გაზრდასთან დაკავშირებით ბათუმის მერთან შუამდგომლობაზე აჭარის მთავრობის ყოფილმა თავმჯდომარემ ზურაბ პატარაძემ უარი თქვა, ამ საკითხის გადაწყვეტა მთლიანად ბათუმის მერიის კომპეტენციაში გადავიდა. გადაწყვეტილებიდან მოკლე ხანში მერიაში შექმნეს „დასახლებათა ტერიტორიების გამოყენებისა და  განაშენიანების რეგულირების საკითხთა საბჭო“, რომელსაც k2 კოეფიცინტების გაზრდაზე კომპანიების წინადადებების შესწავლა დაევალა. საბჭო განიხილავს სამშენებლო კომპანიების მიმართვას კონკრეტულ ზონაში სამშენებლო პროექტების k-2 კოეფიციენტის გაზრდის თაობაზე.

„ბათუმელები“ დაინტერესდა რამდენი ნებართვა გასცა მერიასთან არსებულმა ახალმა საბჭომ და შესაბამისი ინფორმაცია ოფიციალურად გამოითხოვა. აღმოჩნდა, რომ ამ საბჭომ დღემდე 50-მდე განაცხადი განიხილა და 24 შემთხვევაში საკითხი დადებითად, 23 შემთხვევაში კი უარყოფითად გადაწყვიტა. მერიიდან გამოთხოვილი დოკუმენტების მიხედვით, ბათუმის მერმა ლაშა კომახიძემ ამ საბჭოს რეკომენდაციები სრულად გაითვალისწინა და ყველა იმ ცვლილებას, რომელსაც საბჭო დაეთანხმა, მერმა შესაბამისი შინაარსის ბრძანება გამოსცა.

კომისიაში შედიან ასევე მერიის ქალაქგანვითარებისა და ურბანული პოლიტიკის სამსახურის ხელმძღვანელი მირიან მეტრეველი, მუნიციპალური ქონებისა და სერვისების მართვის სამსახურის ხელმძღვანელი გოგა ლომაძე, აჭარის კულტურული მემკვიდრეობის სააგენტოს საბჭოს ხელმძღვანელი ლაშა ჟღენტი და ფინანსთა და ეკონომიკის სამინისტროს ქალაქმშენებლობისა და სივრცითი მოწყობის დეპარტამენტის ხელმძღვანელი ნუგზარ ძნელაძე.

ამ დრომდე k-2-ის გაზრდაზე სამშენებლო კომპანიების მოთხოვნების მიზანშეწონილობას აჭარის მთავრობის აპარატში მომუშავე კომისია სწავლობდა, შემდეგ კი მთავრობის თავმჯდომარე კომპანიებს მერთან შუამდგომლობდა. k-2 საზოგადოების განსჯისა და კრიტიკის საგანი ხშირად გამხდარა – ბევრის აზრით, ეს სქემა კორუფციის მაღალ რისკებს შეიცავდა: სწორედ ამ შინაარსის დისკუსიების შემდეგ თქვა უარი აჭარის მთავრობის თავმჯდომარემ k-2 კოეფიციენტის რეკომენდაციის გაცემაზე.

ეს უფლებამოსილება ახლა მთლიანად მერიას გადასცა.

ნეტგაზეთის მასალების სხვა გამოცემებში გადაბეჭდვის წესი
ავტორი