Batumelebi | სმენაპროთეზირებულ ბავშვთა რეაბილიტაციის პროგრამა აჭარის მუნიციპალიტეტებში სმენაპროთეზირებულ ბავშვთა რეაბილიტაციის პროგრამა აჭარის მუნიციპალიტეტებში – Batumelebi
ნეტგაზეთი • RU

სმენაპროთეზირებულ ბავშვთა რეაბილიტაციის პროგრამა აჭარის მუნიციპალიტეტებში

2019 წელს აჭარის ჯანდაცვის სამინისტრო ახალი პროგრამის “სმენაპროთეზირებულ ბავშვთა აბილიტაცია/რეაბილიტაციის” ამოქმედებას გეგმავს. პროგრამის მიზანია სმენაპროთეზირებული ბავშვების უზრუნველყოფა მათ საჭიროებებზე მორგებული სარეაბილიტაციო მომსახურების კურსებით.

პროგრამა, ასევე, ითვალისწინებს რეაბილიტაციის პროცესში მშობლების მონაწილეობას, მათი პრაქტიკული ჩვევების განვითარებასა და შემდგომი სამოქმედო გეგმის შემუშავებას.

პროგრამის მოსარგებლეები იქნებიან 3-დან 10 წლის ასაკის სხვადასხვა ხარისხის სმენადაქვეითებული, სმენაპროთეზირებული (სმენის აპარატი, კოხლეარული იმპლანტი) ბავშვები.

სოციალური დაცვის დეპარტამენტის უფროსი ინდირა ნაკაიძე ამბობს, რომ ასეთ პროგრამას ბათუმის მერია მიმდინარე წელს ახორციელებს, თუმცა მისი ბენეფიციარები მხოლოდ ბათუმის ტერიტორიაზე მცხოვრები ადამიანები არიან. ჯანდაცვის სამინისტროს პროგრამა კი, აჭარის სხვა მუნიციპალიტეტებსაც მოიცავს.

საწყის ეტაპზე პროგრამაში ათამდე ბენეფიციარი ჩაერთვება, თუმცა ინდირა ნაკაიძის თქმით, საჭიროების შემთხვევაში, შესაძლოა პროგრამაში ცვლილებებიც შევიდეს.

„მაგალითად, კოხლეარული იმპლანტის შემდეგ ბავშვებს გარკვეული დროის მანძილზე უტარდებათ რეაბილიტაცია, რადგან მათ მეტყველების პრობლემა აქვთ. ამიტომ პროგრამის ფარგლებში გათვალისწინებულია 10 ვიზიტი მეტყველების თერაპევტთან და 4 – მუსიკოთერაპევტთან.“

წლის განმავლობაში სულ ორი კურსი ჩატარდება. თითოეული კურსი ექვსდღიანია, რომლებიც, სავარაუდოდ, საახალწლო და საზაფხულო არდადეგებს დაემთხვევა.

„ეს უნდა ჩატარდეს ბათუმში, ოჯახი უნდა ჩამოვიდეს იმ ერთი კვირით ბათუმში, რაც ზოგისთვის შესაძლოა სირთულეებთან იყოს დაკავშრებული. სთეფ ფორვარდის (რომელთაც ჰქონდათ კომუნიკაცია ამ ოჯახებთან) სტატისტიკით, ამ გარემოებების გათვალისწინებით,  პროგრამაში 8-10 ბავშვი ჩაერთვება, მაგრამ თუ საჭიროება იქნება, ბიუჯეტი გადაიხედება.” – ამბობს ინდირა ნაკაიძე – „ამ პროცესში ჩართული იქნებიან მშობლები აუილებლად, ვიმუშავებთ მათი პრაქტიკული ჩვევების განვითარებაზე, შემუშავდება სამოქმედო გეგმა, რაც მშობლისთვის ერთგვარი საშინაო დავალება იქნება, რათა კურსიდან კურსამდე, შესვენების პერიოდში, ბავშვს არ შეუწყდეს რეაბილიტაცია.“

პროგრამის ბიუჯეტი 6 200 ლარია.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან