წინასწარი მონაცემებით, 28 ოქტომბერს დაგეგმილი საპრეზიდენტო არჩევნებისათვის საარჩევნო უბნები საზღვარგარეთ 40-მდე ქვეყანაში გაიხსნება. იმისთვის, რომ საზღვარგარეთ მყოფმა საქართველოს მოქალაქეებმა არჩევანის გაკეთება შეძლონ, მათ შესაბამის ქვეყანაში საქართველოს საკონსულო აღრიცხვაზე ყოფნა ან საზღვარგარეთ რეგისტრაცია დასჭირდებათ.
მათ, ვინც საკონსულო აღრიცხვაზე არ დგას, რეგისტრაცია 7 ოქტომბრის ჩათვლით უნდა გაიარონ.
რეგისტრაციის გასავლელად რამდენიმე გზა არსებობს. კერძოდ, შეგიძლიათ მიმართოთ იმ სახელმწიფოში შექმნილ საუბნო საარჩევნო კომისიას, რომელშიც იმყოფებით, საქართველოს დიპლომატიურ წარმომადგენლობას ან საკონსულო დაწესებულებას.
საკონსულო აღრიცხვაზე დადგომისთვის საჭიროა მოქალაქემ წარადგინოს შევსებული ანკეტა და ნებისმიერი სახის მტკიცებულება, რომ განმცხადებელი არის საქართველოს მოქალაქე ან საქართველოში მუდმივად მცხოვრები მოქალაქეობის არმქონე პირი.
იმ შემთხვევაში, თუ პირადად ვერ ახერხებთ საკონსულოში მისვლას, შეგიძლიათ დახმარება სთხოვოთ მესამე პირს, რომელმაც საჭირო დოკუმენტებთან ერთად საკონსულოში თავისი პირადობის მოწმობა და რწმუნებულების დამადასტურებელი დოკუმენტი უნდა წარადგინოს. რეგისტრაცია უფასოა.
2016 წელს ჩატარებულ საპარლამენტო არჩევნებზე საზღვარგარეთ საარჩევნო უბნები 55 ქვეყანაში იყო გახსნილი. მათგან ყველაზე მეტი, 6 საარჩევნო უბანი – საბერძნეთის რესპუბლიკაში.
2018 წლის 28 ოქტომბერს საქართველოს მოქალაქეები საქართველოს პრეზიდენტს 6 წლის ვადით აირჩევენ.
