მხედველობის პრობლემები სასკოლო ასაკში იჩენს თავს
ბავშვებს, რომლებსაც აქვთ მხედველობის პრობლემა და პატარა ასაკში არ მჟღავნდება, როგორც კი საჭირო გახდება დიდხანს კითხვა, დაფაზე დაწერილის წაკითხვა, ის უეცრად გამოუვლინდებათ. საერთოდ, ჯობია სკოლაში წასვლამდე ბავშვის მხედველობა შემოწმდეს და გაირკვეს, აქვს თუ არა მას ანატომიურად მხედველობის ნაკლი, სჭირდება თუ არა სათვალით კორექცია. მშობლებმა უნდა იცოდნენ და ჩაუტარონ მარტივი ტესტი შვილებს, მაგალითად, ჯერ ცალი თვალით წააკითხეთ კედელზე დაკიდებული კალენდრის რიცხვები, მერე მეორე – თვალით. თუ ბავშვი ვერ კითხულობს, აუცილებლად სჭირდება მას ოფთალმოლოგის კონსულტაცია.
ასეთივე ტესტი თამაშ-თამაშით შეიძლება ჩაუტაროთ ბავშვს, განსაკუთრებით ბიჭებს, დალტონიზმთან დაკავშირებით – ნახეთ, არჩევს თუ არა ის ფერებს ერთმანეთისგან…
როგორი უნდა იყოს ბავშვის მხედველობის რეჟიმი?
ბავშვმა უნდა იმეცადინოს კარგად განათებულ ოთახში. აუცილებელია მაგიდასთან ზურგგამართული ჯდომა, წიგნი და რვეული თვალს 30 სმ-ით უნდა იყოს დაშორებული. სკოლამდელი ასაკის ბავშვი მშობლებმა საერთოდ უნდა მოარიდონ კომპიუტერს. დაწყებითი სასკოლო ასაკის ბავშვის ყოველი 20-30 წუთის აქტიურ მუშაობას (კითხვას, კომპიუტერთან მუშაობას და სხვა) უნდა მოჰყვებოდეს ხუთწუთიანი დასვენება. ასევე, მნიშვნელოვანია სწორი კვება, ზოგადგამაჯანსაღებელი პროცედურები, სპორტი.
რომელი საკვები პროდუქტები უწყობენ ხელს მხედველობის განვითარებას?
მხედველობისთვის სასარგებლო პროდუქტებია: სტაფილო, პომიდორი, თევზი, ღვიძლი, წიწიბურა, მოცვი, მარწყვი, ფორთოხალი, ლიმონი, მანდარინი, გარგარი. რეტინოლის (A ვიტამინის ) შემცველი პროდუქტები აუმჯობესებს ღამის მხედველობას, ზრდის მხედველობის სიმახვილეს და ველს.
რა მეთოდებით მკურნალობენ მხედველობის პრობლემებს?
ძირითად შემთხვევებში ხდება რეფრაქციის მანკის (მიოპია, ჰიპერმეტროპია, ასტიგმატიზმი) კორექცია სათვალით ან კონტაქტური ლინზებით, საჭიროა ფუნქციონალური მკურნალობა, ვარჯიშები თვალშიგა კუნთის ფუნქციის აღსადგენად, მედიკამენტური მკურნალობა, ზოგადგამაჯანსაღებელი მკურნალობა და ახლო მანძილზე მუშაობისას სწორი რეჟიმის დაცვა.
თუ ბავშვს არ აქვს მხედველობის პრობლემა, მაგრამ აქვს რომელიმე სხვა დაავადება, რა უნდა იცოდეს მშობელმა, რომელი მათგანია საშიში მხედველობისთვის?
თუ ბავშვს აქვს დიაბეტი, აუცილებლად წელიწადში ერთხელ მაინც უნდა გაიაროს კონსულტაცია ოფთალმოლოგთან. ბავშვები, რომლებსაც აქვთ რევმატიზმი ან მომატებული რევმატიული სინჯები, ასევე საჭიროებენ ყურადღებას. სისტემური დაავადების შემთხვევაში, ან მაშინ, როცა ოჯახის რომელიმე წევრს, ან ახლო ნათესავებს, აქვთ მხედველობის პრობლემა, აუცილებელია ოფთალმოლოგის კონსულტაცია.
ავტორი: ზარიმა ჩავლეიშვილი
