მარტვილის კანიონი ბუნების ძეგლია და იგი სამეგრელოში, მარტვილის მუნიციპალიტეტში მდებარეობს. კანიონის სიგრძე 2400 მეტრია, ჩაჭრის სიღრმე კი – 20-30 მეტრი.
კანიონში ორ ადგილზე შემონახულია კირქვის ბუნებრივი ხიდები, შუა წელში წარმოიშობა 12-15 მეტრი სიმაღლის ვარდნის მცირე ჩანჩქერები. ერთი ჩანჩქერი ცნობილია „დადიანების საბანაოს“ სახელით. აქ ჩასასვლელად კირქვის დიდი კვადრატებისგან აშენებულ კიბეს უნდა ჩაუყვეთ.
ქვით მოკირწყლული წრიული საფეხმავლო ბილიკი ვიზიტორთა ცენტრიდან იწყება და დადიანების ისტორიულ ბილიკს გაივლის. ბილიკზე განლაგებულია ორი ხიდი, სამი გადასახედი პლატფორმა და კირქვის დიდი ლოდებისგან აგებული 30-საფეხურიანი ისტორიული კიბე.
ვიზიტორებს მდინარეზე გასეირნება შეუძლიათ გასაბერი ნავებით. ნავში აუცილებლად უნდა გეცვათ უსაფრთხოების ჟილეტი. ნავის მართვა მენავესთან ერთად ტურისტებსაც შეუძლიათ.
დაცული ტერიტორიების ეროვნული სააგენტოს ინფორმაციით, 2017 წელს მარტვილის კანიონს 147 644 ვიზიტორი ესტუმრა, ხოლო 2018 წელს, შვიდი თვის განმავლობაში, 86 096 ვიზიტორი, რაც 2017 წლის ანალოგიური პერიოდის მაჩვენებელთან შედარებით 16%-ით მეტია. ვიზიტორთა 48 პროცენტი ქართველია, ხოლო 52 პროცენტი – უცხოელი.
მარტვილის კანიონი
ფოტო: ლელა დუმბაძის
ქართველი ვიზიტორების რაოდენობა გაზრდილია 8 პროცენტით, ხოლო უცხოელი ვიზიტორების რაოდენობა – 24 პროცენტით.
მარტვილის კანიონზე სტუმრობისას „ბათუმელებს“ უთხრეს, რომ ვიზიტორების რიცხვი ყოველწლიურად იზრდება: „არის შემთხვევები, როცა დღეში 1000 – 1500 ტურისტიც კი მიგვიღია“.
შესვლის ღირებულება:
- საქართველოს მოქალაქე და რეზიდენტი პირები – 9 ლარი
- სტუდენტი და სკოლის მოსწავლე – 5 ლარი
- სხვა ქვეყნის მოქალაქე – 15 ლარი
- ნავით გასეირნება 1 ადამიანისთის- 13 ლარი
დამატებითი შეთავაზება:
- სამოქალაქო ქორწინების გაფორმების ცერემონიალი – 100 ლარი;
- კანიონში ყვინთვა – 50ლარი.
ვიზიტორთა რაოდენობა ქვეყნების მიხედვით
