ევროპის მოედანზე მსოფლიო საჭადრაკო ოლიმპიადისადმი მიძღვნილი ღონისძიებისთვის ემზადებიან [ფოტო]

დღეს, 13 მაისს, ევროპის მოედანზე 43-ე მსოფლიო საჭადრაკო ოლიმპიადის „ბათუმი-2018“-ის მზადებისადმი მიძღვნილი ღონისძიებებია დაგეგმილი. ღონისძიებების დაწყებისთვის ევროპის მოედანზე უკვე ემზადებიან. ღონისძიებები 12:00 საათზე დაიწყება.

საორგანიზაციო კომიტეტის ინფორმაციით, ღონისძიებაში მონაწილეობას მიიღებენ: ზურაბ აზმაიფარაშვილი, გიორგი გიორგაძე, ნონა გაფრინაშვილი და ნანა იოსელიანი. გაიმართება ერთდროული თამაშის სეანსები დიდოსტატებსა და ადგილობრივ მოჭადრაკეებს შორის.

ღონისძიების ფარგლებში აგრეთვე მოეწყობა:ორკესტრირებული მსვლელობა და შესრულდება სპეციალურად ამ დღისთვის მომზადებული ფლეშმობი, რომელიც მოახლოებულ საჭადრაკო ოლიმპიადას დააანონსებს; მოეწყობა ფოტო-გამოფენა, სახელდახელო ქვიზ-შოუ, მოწვეული მიმები იზრუნებენ სადღესასწაულო განწყობის შესაქმნელად და სამახსოვრო ფოტოსესიების მოსაწყობად. ღონისძიების დასასრულს კი, საჭადრაკო პროექტი, ონლაინპლატფორმა „მილიონი სვლა“ ჩაირთვება“.

43-ე საჭადრაკო ოლიმპიადა „ბათუმი 2018“ ბათუმში 23 სექტემბრიდან 6 ოქტომბრამდე გაგრძელდება და მასში მსოფლიოს 189 ქვეყნის წარმომადგენელი მიიღებს მონაწილეობას.