უფასო იმიტირებული გამოცდა მეთერთმეტე და მეთორმეტეკლასელებისთვის

საჯარო და კერძო სკოლების მეთერთმეტე და მეთორმეტეკლასელები გამოსაშვები გამოცდების იმიტაციაში მონაწილეობას უფასოდ შეძლებენ. მოსწავლეებს იმიტირებულ გამოცდებში მონაწილეობა „სანდო თანამგზავრის“ საშუალებით შეეძლებათ.

„ტესტირება გამოცდის ანალოგიურად ჩატარდება, ე.წ. CAT-ის ალგორითმით და სისტემით“, – ნათქვამია შეფასებისა და გამოცდების ეროვნული ცენტრის მიერ გავრცელებულ ინფორმაციაში.

იმიტირებული გამოსაშვები გამოცდები 15 და 22 აპრილს ჩატარდება. პირველი იმიტირებული ტესტირებისათვის რეგისტრაცია 11 აპრილს, 15:00 საათზე დაიწყება.

მოსწავლეებმა რეგისტრაცია უნდა გაიარონ ვებგვერდზე www.ug.edu.ge.  ტესტირების მხარდამჭერია საქართველოს უნივერსიტეტი.

რეგისტრირებულ მონაწილეებს მათთვის სასურველ 2 საგანში შეეძლებათ ტესტის გავლა. იმიტირებულ ტესტირებაში მონაწილეობა ნებაყოფლობითია.

მოსწავლეებს ანალოგიური პროექტს სთავაზობს შეფასებისა და გამოცდების ეროვნული ცენტრიც. ამ შემთხვევაში სახელმწიფოს მიერ ორგანიზებული ტესტირება ფასიანია და 5 ლარი ღირს.