ნეტგაზეთი • RU

პორტის თანამშრომლები დირექტორის გადადგომის მოთხოვნით შიმშილობენ

ამ წუთებში ბათუმის პორტში თანამშრომელთა საპროტესტო აქცია მიმდინარეობს. როგორც აქციის მონაწილეებმა „ბათუმელებს“ უთხრეს, ისინი პორტში დაგეგმილ რეორგანიზაციის პროცესს აპროტესტებენ და დირექტორის გადადგომას მოითხოვენ.

თორმეტმა თანამშრომელმა კი შიმშილობა დაიწყო. პორტის პროფკავშირების ხელმძღვანელი, ამირან მიქელაძე ამბობს, რომ პორტს ნავმისადგომის იჯარით გაცემა სურს, რაც შემდგომ თანამშრომლების გათავისუფლებას გამოიწვევს.

პროფკავშირების ხელმძღვანელის თქმით, პორტის ადმინისტრაციას პენსიონერი თანამშრომლების სამსახურიდან გაშვება აქვთ დაგეგმილი.

„იყო დაპირებები, რომ პორტში სამუშაოდ მიიღებდნენ ამ ადამიანების ოჯახის წევრებს, რაც არ მოხდა. მხოლოდ მოხდა ის, რომ მორალური ზეწოლით გაუშვეს 26 პენსიონერი სამუშაოდან. ეს იმას ნიშნავს, რომ ადამიანები დარჩებიან უმუშევარი, ბანკის ვალებით,“-ამბობს მიქელაძე.

ამ ეტაპზე პორტის ხელმძღვანელობა რეორგანიზაციის საკითხზე კომენტარს არ აკეთებს.

„22 წელია აქ ვმუშაობ, 24-საათიანი გრაფიკი გვაქვს.  ახლა გვეუბნებიან, რომ არენდაზე უნდა გადაგვცენ. მიგვამაგრებენ სადაზღვევო კომპანია „ჯი პი აი“-ს, რომელიც ერთი-ორი თვით გვამუშავებს და შემდეგ ყველას გაგვიშვებენ სამსახურიდან.  შეგვიწყვიტეს კონტრაქტი, მაშინ როცა ჩვენ უკან ოჯახებია. სამი შვილი მყავს და არც ერთი არ მუშაობს,“-ამბობს მედამბულატორიის თანამშრომელი, ნანა ნადარეიშვილი.

რეორგანიზაცია დაახლოებით 750 ადამიანს შეეხება. მათ შორის, დამლაგებლებსა და მძღოლებსაც.

მოშიმშილეები ბათუმის პორტში

პორტის 12-მა თანამშრომელმა შიმშილობა დაიწყო.
ფოტო: მანანა ქველიაშვილი

ნეტგაზეთის მასალების სხვა გამოცემებში გადაბეჭდვის წესი
ავტორი