![ბათუმის თევზის ბაზარი [ფოტორეპორტაჟი]](https://batumelebi.netgazeti.ge/wp-content/uploads/2018/03/meTevze1.jpg "ბათუმის თევზის ბაზარი [ფოტორეპორტაჟი]")
ავტორი: მანანა ქველიაშვილი
ბათუმის თევზის ბაზარში არ უყვართ ორშაბათი. კვირის ამ დღეს აქ ცოტა ხალხია. დღე მდორედ გადის და არც დიდი ფინანსური სარგებელი მოაქვს მოვაჭრეებისთვის. სამაგიეროდ უყვართ პარასკევი, შაბათი და კვირა. დღეები, როცა ბაზარში წასასვლელად ბათუმელებიც იცლიან და ტურისტებიც მრავლად არიან ქალაქში.
გაყინული და აუზებში გამოყვანილი თევზის გარდა ბაზარში შავ ზღვაში დაჭერილი თევზიც იყიდება. თევზის გამყიდველები სანაპიროზე გადიან და ზღვაში გასული მეთევზეების დაბრუნებას ელოდებიან, რომ დახლზე დასადები თევზი იყიდონ.
მეთევზეები დღეს დილით ზღვიდან უთევზოდ დაბრუნდნენ
ფოტო: მანანა ქველიაშვილი/ბათუმელები
ამირან შოთაძეს და ვლადიმერ ვაშაკიძეს დღეს არ გაუმართლა. ათიოდე ბარაბულკა დაიჭირეს მხოლოდ. ამბობენ, ზღვაში შორ მანძილზე შესვლის უფლება რომ ჰქონდეთ, თევზი არ მოაკლდებოდათ. დღეს მოქმედი კანონმდებლობით სანაპირო მეთევზეებს ზღვაში შესვლა მხოლოდ 2 მილის რადიუსზე შეუძლიათ.
ეს დიმა მორევია. 20 წელია მეთევზეა. ზღვაში სათევზაოდ ყოველ დილით შედის.
ფოტო: მანანა ქველიაშვილი/ბათუმელები
დიმა ამბობს, რომ დღეს არც თუ ისე წარმატებული დღე ჰქონდა. მხოლოდ 50 კილოგრამამდე მიდიების ამოღება შეძლო ზღვიდან. მაშინ, როცა ზაფხულობით ზღვაში ერთ გასვლაზე დაახლოებით 100 კილოგრამ მიდიას იღებს.
მიდიებიც და ზღვის სხვა პროდუქტებიც, შავი ზღვის სანაპიროდან ბათუმის თევზის ბაზარში ხვდება
დილა თევზის ბაზარში ყავით იწყება
ბაზარში მომუშავე რძალ-მულს, თეონა გელაშვილს და მარინა კეკენაძეს ოჯახური ბიზნესი აქვთ. სამსახურში ყოველ დილით ცხრა საათზე მოდიან. დახლს ასუფთავებენ, თევზს აწყობენ და სანამ მყიდველები გამოჩნდებიან, ყავის დალევასაც ასწრებენ
თუ თევზი გიყვართ, მაგრამ მისი მომზადების პროცესი დიდად არ გხიბლავთ, შეგიძლიათ ბაზარში ნაყიდი თევზი იქვე გაასუფთავებინოთ და შეაწვევინოთ
