ბათუმში, თბილისის მოედანზე, ავტომანქანის ერთი საათით გაჩერების საფასური ერთი ლარი იქნება – მერიამ შესაბამის დადგენილებაში ცვლილების შესახებ პროექტი საკრებულოს უკვე წარუდგინა. საკითხი დასამტკიცებლად ხვალ, 16 მარტს, დაგეგმილი სხდომის დღის წესრიგშია შეტანილი.
მერია პარკირების საერთო და სპეციალური ადგილებით სარგებლობის საფასურის დადგენის შესახებ ბათუმის საკრებულოს 2013 წლის დადგენილებაში ცვლილებას ითხოვს. ცვლილების შესახებ პროექტის თანახმად მერიაში მიიჩნევენ, რომ ბათუმში, თბილისის მოედანზე, პარკირების ადგილებისა და საზოგადოებრივი ტრანსპორტის ოპტიმიზაცია, მათ შორის მუნიციპალური ავტობუსისთვის გამოყოფილი სპეციალური გაჩერების ადგილები, დადებით გავლენას მოახდენს ქალაქში კერძო და საზოგადოებრივი ტრანსპორტის ორგანიზებულად მოძრაობაზე და ამ მიმართულებით ქალაქში შექმნილ სიტუაციას გააუმჯობესებს.
მერია თბილისის მოედანზე კერძო და საზოგადოებრივი ტრანსპორტის მონიტორინგისთვის საჭირო ინფრასტრუქტურის მოწყობას გეგმავს. ამ ტერიტორიაზე მოეწყობა პარკირების ადგილი ორმოცი ერთეული ავტოსატრანსპორტო საშუალებისთვის, ავტობუსების გაჩერება და პარკომეტრი – სწრაფი გადახდის აპარატი. ამ ყველაფრის ხარჯებს მერია შპს „ბათუმის ავტოტრანსპორტის “ ბიუჯეტიდან გაიღებს.
