Batumelebi | ქობულეთში წყალდიდობის შედეგად ყველაზე მეტად გელაურის დასახლება დაზიანდა ქობულეთში წყალდიდობის შედეგად ყველაზე მეტად გელაურის დასახლება დაზიანდა – Batumelebi
RU | GE  

ქობულეთში წყალდიდობის შედეგად ყველაზე მეტად გელაურის დასახლება დაზიანდა

 

ბოლო მონაცემებით, ქობულეთში გუშინდელი წყალდიდობის შედეგად, ყველაზე მეტად გელაურის დასახლება დაზიანდა, სადაც ყველა სახლის პირველი სართული დაიტბორა. აჭარის მთავრობის ინფორმაციით, დღეს დილისთვის საცხოვრებელი სახლებიდან წყალი მთლიანად ამოტუმბულია. საგზაო სამსახური დამეწყრილი გზების გაწმენდაზე დღეს დილიდან მუშაობს.

 

საგანგებო შტაბის სხდომა, ქობულეთის მუნიციპალიტეტის გამგეობის შენობაში გუშინ გვიან ღამემდე გაგრძელდა. სხდომაზე დეტალურად განიხილეს ყველა ის შემთხვევა, რომელიც დღის განმავლობაში ქალაქის სხვადასხვა უბანში და მუნიციპალიტეტის სოფლებში დაფიქსირდა. 

აჭარის მთავრობის ინფორმაციით, სპეციალური ტექნიკა მთელი ღამის განმავლობაში მუშაობდა ქობულეთში. მთავრობის თავმჯდომარემ მუნიციპალიტეტის ოცდაერთივე ადმინისტრაციული ერთეულის წარმომადგენელთან ერთად დეტალურად განიხილა სოფლებში დაფიქსირებული დაზიანებები. ზარალის დათვლა დღეიდან დაიწყება. 

 

არსებული მდგომარეობის შესასწავლად გავლენ გეოლოგთა ჯგუფები. 

 

მსხვერპლი და ნგრევა სტიქიას არ მოჰყოლია. 

 

შეგახსენებთ, რომ გუშინ უხვმა ნალექმა ქობულეთში უბნები დატბორა, რამდენიმე სოფელში ჩამოწვა მეწყერი, რის გამოც ცენტრალური მაგისტრალის გარკვეულ მონაკვეთზე შეიზღუდა მოძრაობა, სამ საჯარო სკოლაში კი შეჩერდა სასწავლო პროცესი.

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები“