ქობულეთის გამგებელი სულხან ევგენიძე: „წუხელ 3-4 საათზე უხვი ნალექის გამო წამოვიდა ნიაღვარი, მდინარე აჭყვა გადმოვიდა კალაპოტიდან. მთელი გელაური, სადგური, ჯავახიშვილის უბანი, ახალისოფელი, ბაზრის ტერიტორია და კოსტავას ქუჩაც, ფაქტობრივად დატბორილია. მსხვერპლი არ არის. დიდი ზარალია სოფლებშიც ჩამოწვა მეწყერი, ცეცხლაურში არის გზა გადაკეტილი“.
მობილიზება
ადგილზე მობილიზებულია სამაშველო სამსახურები გურიიდან, ბათუმიდან, ქობულეთის დასუფთავებისა და გამწვანების სამსახურიც.
სულხან ევგენიძე: „ეზოში დიდი წყალია. მოსახლეობას დილით ვაღვიძებდით, რომ საყოფაცხოვრებო ნივთები მეორე სართულზე აეტანათ, ვინც გვიკავშირდება, უსაფრთხო ადგილას გადაგვყავს, მაგრამ სანამ წყალი არ დაშრება ვერაფერს ვერ გავაკეთებთ“.
გზები
დატბორილ უბნებში აკრძალულია მოძრაობა ავტომობილებით.
თუმცა გადაადგილება შეუზღუდავია აღმაშენებლის ქუჩაზე (ცენტრალური ქუჩა), სადაც წვიმას კრიტიკული სიტუაცია არ შეუქმნია.
სკოლები და ბაღები
სკოლებსა და ბაღებში რომელიც აქ მდებარეობდა სასწავლო პროცესი შეწყვეტილია.
ამჟამად სოფლებში ძლიერი წვიმაა, ქობულეთში შედარებით მცირე. გამგებლის თქმით, დაზუსტებული ინფორმაცია, თუ სად რა მოხდა, საღამოსკენ იქნება ცნობილი.
