Batumelebi | ბათუმის სასაფლაოს ყოფილი დირექტორი სასამართლომ უკანონოდ გათავისუფლებულად ცნო ბათუმის სასაფლაოს ყოფილი დირექტორი სასამართლომ უკანონოდ გათავისუფლებულად ცნო – Batumelebi
RU | GE  

ბათუმის სასაფლაოს ყოფილი დირექტორი სასამართლომ უკანონოდ გათავისუფლებულად ცნო

 

ბათუმის საქალაქო სასამართლოს გადაწყვეტილებით აიპი „ბათუმის სასაფლაოების“ ყოფილი დირექტორი ლაშა ბერძენიშვილი თანამდებობაზე უნდა აღდგეს და აუნაზღაურდეს ნაცდური თვეების ხელფასი – ამის შესახებ დღეს ბათუმის საკრებულოში გამართულ ბრიფინგზე ბათუმის საკრებულოს წევრმა „ნაციონალური მოძრაობიდან“ გიორგი კირთაძემ განაცხადა.  

გიორგი კირთაძე და ლაშა ბერძენიშვილი

ლაშა ბერძენიშვილის განცხადებით, იგი 2015 წლის 23 აპრილს გაათავისუფლა თანამდებობიდან ქალაქის მერმა, გიორგი ერმაკოვმა, მისთვის უცნობი მიზეზის გამო. „რადგან არ ვიყავი მისი სამეგობრო წრიდან, ამიტომ გამიშვეს თანამდებობიდან“ – აღნიშნა ლაშა ბერძენიშვილმა.

გიორგი კირთაძემ განაცხადა, რომ ბათუმის საქალაქო სასამართლოს გადაწყვეტილებამ კიდევ ერთხელ აჩვენა, თუ როგორ მუშაობს ქალაქის მერი: „ის იღებს გადაწყვეტილებებს არა კანონის შესაბამისად, არამედ პირადი შეხედულებებით, რომელიც ეფუძნება მხოლოდ ერთ პრინციპს: თანამდებობებზე უდნა მუშაობდნენ მხოლოდ ის ადამიანები, ვინც არიან მისი მეგობრები და გუნდის წევრები“ – განაცხადა გიორგი კირთაძემ.  

მისივე თქმით, ლაშა ბერძენიშვილის სამსახურიდან გათავისუფლების გადაწყვეტილება საეჭვოდ დაემთხვა აიპი „ბათუმის სასაფლაოების“ მიერ 3 მილიონ 600-ათასლარიანი ტენდერის გამოცხადებას: „მოხდა ისე, რომ ჯერ ლაშა ბერძენიშვილი გაათავისუფლეს სამსხურიდან და შემდეგ გამოცხადდა ტენდერი, რაც ეჭვებს ბადებს.“

გიორგი კირთაძემ ასევე აღნიშნა, რომ ლაშა ბერძენიშვილის გათავისუფლების შემდეგ ამ თანამდებობაზე საკრებულოს თავმჯდომარის ირაკლი ჭეიშვილის მეგობარი, ავთანდილ ბურკაძე დანიშნეს, რომელიც მანამდე ორჯერ ჩაიჭრა ბათუმის მერიაში  ვაკანტური თანამდებობების დასაკავებლად გამოცხადებულ კონკურსში

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"