Batumelebi | ტური აგროსერვისცენტრში გამოცდილების გაზიარებისთვის ტური აგროსერვისცენტრში გამოცდილების გაზიარებისთვის – Batumelebi
RU | GE  

ტური აგროსერვისცენტრში გამოცდილების გაზიარებისთვის

 

აგროსერვისცენტრის საზოგადოებასთან სამსახურის ინფორმაციით, ცენტრის მიერ განხორციელებულ პროექტებს 16 მუნიციპალიტეტის საინფორმაციო-საკონსულტაციო სამსახურების წარმომადგენლები გაეცნენ. საერთაშორისო ორგანიზაცია „Merci Corps”-ის მიერ ორგანიზებული აგროტურის ფარგლებში კახეთის, შიდა და ქვემო ქართლის, სამცხე-ჯავახეთისა და იმერეთის წარმომადგენლებმა აგროსერვისცენტრში მიმდინარე და განხორციელებული პროექტების შესახებ პრეზენტაცია მოისმინეს. სტუმრებმა, რომელთა შორის საქართველოს სოფლის მეურნეობის სამინისტროს სასოფლო-სამეურნეო კოოპერატივების განვითარების სააგენტოსა და მერსი ქორფსის წარმომადგენლებიც იყვნენ, აგროსერვისცენტრის ვაზისა და ხეხილის სანერგე მეურნეობა, მარწყვისა და ბულგარულის სათბურები, მშენებარე ღვინის სახლი და ბალახის ინტენსიური წარმოების დანადგარი მოინახულეს. აგროტურის მიზანი აჭარაში, სოფლის მეურნეობისა და ექსტენციის მომსახურების კუთხით აგროსერვისცენტრის გამოცდილების სხვა რეგიონებისთვის გაზიარებაა. 

 

 „მნიშვნელოვანია აგროსერვისცენტრის გამოცდილების სხვა რეგიონებისთვის გაზიარება. ჩვენთან სოფლის მეურნეობის დარგის განვითარებისთვის არაერთი სადემონსტრაციო პროექტი ხორციელდება, რომელიც ექსტენციის მომსახურების საშუალებით ფერმერებამდე მიდის. მაგალითად, ჩვენი მარწყვის სადემონსტრაციო სათბურში ფერმერების ვიზიტის შემდეგ რამდენიმემ თვითონ დაიწყო ეს ბიზნესი. ამ პროექტების მთავარი დანიშნულებაც სწორედ ესაა, თანამედროვე ტექნოლოგიების ფერმერულ მეურნეობებში დანერგვა. დღევანდელი აგროტურის მონაწილეები კი აგროსერვისცენტრში არსებული პროექტების შესახებ ინფორმაციას თავიანთ მუნიციპალიტეტებში ფერმერებს გაუზიარებენ. კარგი იქნება, თუ მოხდება რომელიმე პროექტის მაგალითის გადაღებაც“ – განაცხადა აგროსერვისცენტრის დირექტორმა გოჩა ბერიძემ. 


ნეტგაზეთის მასალების სხვა გამოცემებში გადაბეჭდვის წესი
"ბათუმელები"