შინაგან საქმეთა სამინისტრო საპატრულო პოლიციისთვის 5 მილიონ 80 ათას ლარად სამხრე ვიდეოკამერების სისტემის განახლებას გეგმავს. კამერების შეძენას სამინისტრო ტენდერის გარეშე აპირებს. შსს აცხადებს, რომ „საპატრულო პოლიციაში არსებული სამხრე კამერები წარმოადგენს როგორც ადმინისტრაციულ, ასევე სისხლის სამართლის საქმეებზე მყარ და უტყუარ მტკიცებულებას“, თუმცა „კამერები მე-5 წელია ხმარებაშია და უმეტესობას ეწურება სასიცოცხლო ციკლი, რის გამოც ვეღარ პასუხობს თანამედროვე მოთხოვნებს. შესაბამისად, რიგ შემთხვევებში ვერ ხდება ჩანაწერის მოძიება და შესწავლა“.
„საზოგადოების დაკვეთაა მაქსიმალურად იქნას დაცული როგორც საპატრულო პოლიციის თანამშრომლების, ასევე მოქალაქეების უდანაშაულობის პრეზუმცია,“ – აცხადებს შსს.
სამინისტროს ინფორმაციით, საპატრულო პოლიციის დეპარტამენტი ამჟამად სარგებლობს ჩინური წარმოების AEE ბრენდის სამხრე ვიდეოკამერებით. „ისინი, დღეის მდგომარეობით, მოძველებულია და ხშირია ჩაწერილი ფაილების ტექნიკური წუნი“.
სამინისტროს მიერ შესყიდვების ვებგვერდზე ატვირთულ განაცხადში აღნიშნულია, რომ „ბაზრის კვლევის ფარგლებში წარმოდგენილი იქნა მხოლოდ ერთი შემოთავაზება – ,,AXON”-ის ბრენდის ,,AXON BODY 2″ სამხრე კამერა. შემოთავაზებული სამხრე კამერა ტექნიკური მახასიათებლებით სრულად აკმაყოფილებს საპატრულო პოლიციის მოთხოვნებს“.
„შემოთავაზებული ვიდეოკამერების სისტემა წარმატებით არის დანერგილი და ექსპლუატაციაშია შემდეგ ქვეყნებში: ავსტრალია, ავსტრია, კანადა, დანია, დუბაის საამირო, ინგლისი, საფრანგეთი, ჰონკონგი, ინდონეზია, ირლანდია, იტალია, ისრაელი, ლატვია, მაკედონია, მოროკო, ნიდერლანდები, ახალი ზელანდია, პოლონეთი, პორტუგალია, რუმინეთი, სლოვაკეთი, ესპანეთი, სინგაპური, შვედეთი და ამერიკის შეერთებული შტატები. ამასთან, ზემოაღნიშნულ სისტემას ამჟამად მოიხმარენ სხვადასხვა ქვეყნების შემდეგი უწყებები: ლონდონის მეტროპოლიტენი, ჩიკაგოს პოლიცია, ლოს ანჯელესის პოლიცია, მანჩესტერის პოლიცია, ბრიტანეთის ტრანსპორტის პოლიცია, ფილადელფიის პოლიცია, ლას ვეგასის პოლიცია, ვიქტორიას (ავსტრალია) პოლიცია და სხვა“, – აცხადებს შსს.
სამინისტროში მიიჩნევენ, რომ სატენდერო პროცედურები არ იძლევა საშუალებას „კონკრეტულად იქნას მითითებული შესყიდვის ობიექტის მახასიათებლები და შერჩევისას გათვალისწინებული იქნას წამყვანი ქვეყნების გამოცდილება და ვინაიდან საუბარია სახელმწიფო და საზოგადო მნიშვნელობის პროექტზე, მიზანშეწონილია შესყიდვა განხორციელდეს დროის უმოკლეს ვადებში გამარტივებული შესყიდვის საშუალებით“.
პროექტის განხორციელება [სამხრე ვიდეოკამერების სისტემის განახლება] დაგეგმილია 2018 წელს, კერძოდ, სამხრე კამერების, სერვერული ინფრასტრუქტურის, პროგრამული უზრუნველყოფის, დამტენი და ინფორმაციის შემნახველი სადგურების მოწოდება/გამართვა უნდა განხორციელდეს არაუმეტეს 2018 წლის მაისის თვისა.
შესყიდვის ობიექტების ჩამონათვალი და ოდენობა:
[checklist]
- ოფიცრის სამკერდე კამერა კომპლექტში (1 ცალი USB A TO 2.5MM კაბელი და 2 ცალი მაგნიტური სამაგრი) – 2280 კომპლექტი;
- ე.წ. “დოკი” (დამტენი და ინფორმაციის წამკითხველი სადგური) კომპლექტში: 2280 კამერის შესაბამისი;
- ადმინისტრატორის მუდმივი ლიცენზია – 5 ცალი;
- კამერის მუდმივი ლიცენზია – 2280 ცალი;
- სერვერები – 3 ცალი;
- მონაცემთა შესანახი ბაზა – 1 ცალი.
[/checklist]
მთავარი ფოტო: პატრული / ფოტო: შსს
