Batumelebi | წვიმის გამო UNESCO-ს საიუბილეო გალა-კონცერტი პიაცადან მუსიკალურ ცენტრში გადაიტანეს წვიმის გამო UNESCO-ს საიუბილეო გალა-კონცერტი პიაცადან მუსიკალურ ცენტრში გადაიტანეს – Batumelebi
RU | GE  

წვიმის გამო UNESCO-ს საიუბილეო გალა-კონცერტი პიაცადან მუსიკალურ ცენტრში გადაიტანეს

 

„მუსიკა მშვიდობისათვის“ – ბათუმში საერთაშორისო მუსიკალური ფესტივალის ფარგლებში გალა-კონცერტი დღეს, 15 სექტემბერს გაიმართება. ორგანიზატორების ინფორმაციით, მოსალოდნელი წვიმის გამო ფესტივალის დახურვის გალა-კონცერტი ბათუმის მუსიკალურ ცენტრშია გადატანილი. ფესტივალი, რომლის დამფუძნებელია ცნობილი პიანისტი, UNESCO-ს მშვიდობის არტისტი ელისო ბოლქვაძე, საქართველოს კულტურისა და ძეგლთა დაცვის სამინისტროს მხარდაჭერით 10 სექტემბერს გაიხსნა. 

 

 

ფესტივალის დასკვნითი გალა-კონცერტი იუნესკოს 70 წლის იუბილეს ეძღვნება და მას იუნესკოს გენერალური დირექტორის მოადგილე ერიკ ფალტი საქართველოს ხელისუფლების წარმომადგენლებთან და დიპლომატიურ კორპუსთან ერთად დაესწრება. საქველმოქმედო კონცერტიდან შემოსული თანხა გადაირიცხება სირიაში ომის შედეგად დაზარალებული ბავშვების საგანმანათლებლო პროგრამებისთვის UNESCO-ს ეგიდით შექმნილ დახმარების ფონდში.

 

დასკვნით საღამოზე თავად ელისო ბოლქვაძე დაუკრავს. სპეციალურად ფესტივალისთვის საქართველოში ჩამოდის ტენორი ზურაბ სოტკილავა. კლასიკურ მუსიკასთან ერთად იქნება ფოლკლორიც, ანსამბლი „ქართული ხმები“ ქართულ ხალხურ სიმღერებს შეასრულებს.

 

2015 წლის იანვარში, საგარეო საქმეთა სამინისტროს წარდგინების საფუძველზე, პირველად საქართველოს ისტორიაში, გამოჩენილ ქართველ პიანისტს ელისო ბოლქვაძეს, მიენიჭა წოდება „UNESCO-ს ხელოვანი მშვიდობისათვის“.

 

BATUMI MUSIC FEST-ი  ელისო ბოლქვაძის საქველმოქმედო ფონდ „ლირას“ ორგანიზებით მესამე წელია ტარდება და მას საგანმანათლებლო ფუნქციაც აქვს. ფესტივალის ფარგლებში ტარდება მასტერ-კლასები ახალგაზრდა მუსიკოსებისთვის.

 

დაარსების დღიდან ბათუმის მუსიკალური ფესტივალის მხარდამჭერია საქართველოს კულტურისა და ძეგლთა დაცვის სამინისტრო, აჭარის ავტონომიური რესპუბლიკის მთავრობა, ფრანგული ინსტიტუტი საქართველოში და საფრანგეთის საელჩო. 2015 წელს ბათუმის მუსიკალური ფესტივალი თანამშრომლობს აზერბაიჯანისა და თურქეთის საელჩოებთან.

 

ნეტგაზეთის მასალების სხვა გამოცემებში გადაბეჭდვის წესი
ბათუმელები