Batumelebi | მერის მოადგილე: ბათუმობაზე ჯერ ჩამოყალიბებული არ ვართ მერის მოადგილე: ბათუმობაზე ჯერ ჩამოყალიბებული არ ვართ – Batumelebi
RU | GE  

მერის მოადგილე: ბათუმობაზე ჯერ ჩამოყალიბებული არ ვართ

 

ბათუმის მერიაში ჯერ არ ასახელებენ თარიღს, თუ როდისთვის გეგმავს მერია „ბათუმობის“ ჩატარებას. გასულ წლის მიხედვით თუ ვიმსჯელებთ, სახალხო დღესასწაულის ჩატარებამდე ორიოდე კვირაა დროა დარჩენილი – შარშან „ბათუმობა“ 1-2 სექტემბერს ჩატარდა.

 

გაზეთ „ბათუმელებს“ აინტერესებდა, როგორ ემზადება მერია „ბათუმობისათვის“, მაგრამ სამზადისის შესახებ ინფორმაციის მიღება „ბათუმელებისთვის“ წელს იმაზე რთული აღმოჩნდა, ვიდრე წინა ორ წელში. ინფორმაციის მიღებასთან დაკავშირებით მოლაპარაკება უშედეგო აღმოჩნდა მერიის პრესსამსახურთან. ამის მიღწევა ასევე შეუძლებელი აღმოჩნდა უფრო მაღალი პასუხისმგებლობის მქონე თანამდებობის პირთან. მერის მოადგილემ, ალექსანდრეე მითაიშვილმა სატელეფონო საუბარში აღნიშნა: „თუ პრესსამსახურთან უკვე ისაუბრეთ, რაღა გინდათ? – ჯერ ჩამოყალიბებული არ ვართ. მიდის მუშაობა და როცა ჩამოვყალიბდებით, მაშინ ვილაპარაკებთ“.

 

კითხვაზე: ანუ დავწეროთ, რომ სექტემბრამდე ორი კვირით ადრე „ბათუმობის“ შესახებ მერია ჩამოყალიბებული არ არის? – მერის მოადგილემ ასე გვიპასუხა: „თქვენ მოტივირებული ხართ, რომ ეს დაწეროთ. დიახ, ვართ ჩამოყალიბებული, ვმუშაობთ და რომ დასრულდება, შევჯერდებით და ყველაფერზე შემდეგ ვილაპარაკებთ“.

 

2015 წლის ბიუჯეტში „ბათუმობისთვის“ 200 000 ლარია გათვალისწინებული.

 

წინა წლებში ჩატარებული „ბათუმობა“ საზოგადოების განხილვის საგანი არა ერთხელ გახდა. „ბათუმობისათვის“ გათვალისწინებული თანხა წინა წლებშიც სოლიდური იყო, მაგრამ ყველა ხარვეზი, რაც „ბათუმობას“ ახლდა, საზოგადოების შეფასებით, არასწორი და დაგვიანებული დაგეგმვის შედეგი იყო.

 

ბათუმის მერია
ბათუმის მერია

ნეტგაზეთის მასალების სხვა გამოცემებში გადაბეჭდვის წესი
"ბათუმელები”