Batumelebi | იძებნება 84 ათასი დოლარის მოპარვაში ბრალდებული იძებნება 84 ათასი დოლარის მოპარვაში ბრალდებული – Batumelebi
RU | GE  

იძებნება 84 ათასი დოლარის მოპარვაში ბრალდებული

 

საქმის მასალების მიხედვით, ბრალდებულმა დამსაქმებლის სამუშაო მაგიდის უჯრიდან პლასტიკური ბარათი მოიპარა. პაკეტშივე იდო ბარათის კოდი. შესაბამისად, ის  ორი თვის განმავლობაში ბათუმში, სხვადასხვა ბანკის ბანკომატიდან იღებდა თანხას. საერთო ჯამში, ბრალდებულმა 84 ათასი დოლარი მოპარა თავის ხელმძღვანელს, რომელიც საქართველოში იმ დროისთვის არ იმყოფებოდა. ბრალდებული საქართველოს მოქალაქეა, დაზარალებული – თურქეთის. 

 

პოლიცია
პოლიცია

მას შემდეგ, რაც დაზარალებული ბათუმში დაბრუნდა, ბრალდებულმა საქართველო დატოვა. სამართალდამცავები ბრალდებულს დღემდე ეძებენ, თუმცა ჯერჯერობით მისი ადგილსამყოფელი უცნობია. მის უფლებებს სასამართლოში სახელმწიფო ადვოკატი ნუგზარ გრძელიძე იცავს.

 

საქმის მასალები, 224 გვერდი, უკვე გადაეცა ბათუმის საქალაქო სასამართლოს, მათ შორისაა მტკიცებულებათა ნუსხა: ბანკომატებიდან (თიბისი,  ლიბერთი, ვითიბი, პროკრედიტი და საქართველოს ბანკები) ამოღებული სათვალთვალო კამერების ჩანაწერები, რომლებზეც ასახულია თუ როგორ გააქვს ბრალდებულს სხვადასხვა დროს ბარათის გამოყენებით თანხა. საქმეშივე ინახება საზღვრის გადაკვეთის დამადასტურებელი დოკუმენტი.

 

ადვოკატმა ნუგზარ გრძელიძემ მოსამართლეს უთხრა, რომ ბრალდებულისთვის შეფარდებული აღკვეთი ღონისძიება – პატიმრობა უნდა გაუქმდეს, რადგან მისი შეფასებით, ბრალდებულმა სავარაუდოდ არც იცის, რომ ის ძებნილია. ადვოკატმა ასევე თქვა, რომ ის სადავოდ ხდის ყველა მტკიცებულებას, რაც პროკურატურამ საქმეზე მოიპოვა.

 

მოსამართლის ინფორმაციით, სასამართლოში მტკიცებულებები მხოლოდ ბრალდების მხარემ წარადგინა, დაცვის მხარეს კი არავითარი მტკიცებულება არ ჰქონია. მოსამართლის თქმით, დიდი ალბათობით ბრალდებულის მიმართ გამამტყუნებელი განაჩენი დადგება, ამიტომაც დაცვის მხარის შუამდგომლობა აღკვეთი ღონისძიების – პატიმრობის გაუქმების შესახებ, არ დააკმაყოფილა.

 

საქმის პროკურორი ლევან მურვანიძეა.

 

ბრალდებულიც და დაზარალებულიც კომპანია ,,ვოგში“ მუშაობდნენ.

ბრალდებულმა საქართველო სარფის გავლით დატოვა. 

 

ნეტგაზეთის მასალების სხვა გამოცემებში გადაბეჭდვის წესი
ნათია როყვა