თეონა შერვაშიძე
ტურისტების მოზიდვის გარდა, თეონას სხვა ფუნქციაც აქვს, მას შტურვალთან (ანუ გემის საჭესთან) დგომაც უწევს: „მართალია, გემწამყვანის სპეციალობაზე არ ვსწავლობ, მაგრამ გამომდის. კაპიტანი გვერდით მიდგას და მასწავლის. გუშინ მთელი დღე, ფაქტობრივად, მე ვიდეგი შტურვალთან. ეს ადრენალინია ჩემთვის და ამავდროულად დიდი პასუხისმგებლობაც“.
თეონამ წელს პირველად დაიწყო მუშაობა და პირველი ხელფასიც აიღო. „ეს ძალიან დიდი სტიმულია. მე და ჩემი ერთი ჯგუფელი ვმუშაობთ, ძალიან მსიამოვნებს. გარდა იმისა, რომ ანაზღაურება მაქვს, აქ მუშაობა პრაქტიკაშიც მეთვლება“, – გვეუბნება თეონა.
სამუშაო დილის ათი საათიდან იწყება და საღამოს თერთმეტ საათამდე გრძელდება. „რთულია, მაგრამ საინტერესო, რადგან მრავალფეროვანი გარემოა, ბევრ უცხოელს ხვდები და ეკონტაქტები. საინტერესოა შტურვალთან დგომაც. ტურიზმის მენეჯმენტს ვსწავლობ და მომავალში საკრუიზო გემზე ვაპირებ მენეჯერად მუშაობას, ამიტომ ტურისტების აზრი სერვისზე ძალიან მნიშვნელოვანია. ვფიქრობ, მოსწონთ ჩვენი სერვისი, მხოლოდ სომხეთიდან ჩამოსულმა ტურისტებმა გვითხრეს, რომ ფასი არ შეესაბამება იმ მანძილს, რასაც გავდივართ. იახტა ზღვაზე ნახევარი საათით გადის და ეს დრო ეცოტავებათ“.
თეონა ამბობს, რომ ტურისტებს მოსწონთ, როცა შტურვალთან გოგონაა. „მოდიან და ფოტოებს იღებენ ჩემთან. მითხრეს, გაგვიხარდება თუ მომავალშიც შენ დაგვხვდებიო. გარდა ამისა, უცხოელებთან ურთიერთობა რუსული და ინგლისური ენის ცოდნის გაუმჯობესებაში მეხმარება“.
თეონას თქმით, ეკიპაჟი შეხმატკბილებულია და ეს მუშაობას ამარტივებს. „კარგია როცა მუშაობ, დამოუკიდებლობას გრძნობ და ეს სასიამოვნოა. მართალია, მეგობრებთან, ოჯახის წევრებთან ყოფნას შედარებით მოვაკლდი, მაგრამ მომავლისთვის დიდი ნაბიჯი გადავდგი და მიხარია“.
თეონას მიზნები ცნობილ საკრუიზო გემებს – Royal Caribbean-sa და Carnival Corporation-ს უკავშირდება. ამბობს, რომ ამ მიზნის მიღწევას ბევრი შრომა, მეტი გამოცდილება და აქტიური ცხოვრება სჭირდება.
