„დემოკრატიის ინსტიტუტი“ გვრიტუნა ჯაფარიძის მონათხრობს ავრცელებს.
„2012 წლის 4 აპრილს მაღაზიაში შემოვიდა ახალგაზრდა, უცნობი მამაკაცი, რომელმაც მთხოვა ფინანსურად დავხმარებოდი შეზღუდული შესაძლებლობების მქონე ბავშვს, რომლის ფოტოც სპეციალურად დამზადებულ ეგრეთ წოდებულ მოწყალების ყუთზე იყო მიკრული. გარკვეული რაოდენობის თანხით დავეხმარე და ვუამბე, რომ მეც მყავდა შშმ ბავშვი, რომელიც ასევე საჭიროებდა დახმარებას. უცნობი მამაკაცი გამეცნო და მითხრა, რომ მუშაობდა საქველმოქმედო ორგანიზაციაში. ასევე, ამიხსნა, რომ იმ შემთხვევაში, თუ გადავცემდი ბავშვის ფოტო სურათს, ჯანმრთელობის ცნობას, ჩემი პირადობის მოწმობის ასლსა და ანგარიშის ნომერს, ის დამეხმარეობდა ჩემი შვილის დასახმარებლად თანხის მობილიზებაში. ჩემი სურვილის შემთხვევაში, მეორე დღესვე გამაწევრიანებდა ორგანიზაციაში და თანხის შეგროვების მიზნით, მაღაზიაში დამიდგამდა მოწყალების ყუთს. ამასთანავე, დამპირდა, რომ ყოველთვიურად მინიმუმ 50 ლარს გადმომირიცხავდა ანგარიშზე. შევაგროვე დოკუმენტები და 2012 წლის 5 აპრილს სრულად გადავეცი. გიორგიმ (სახელი პირობითია) რამდენიმე დღეში მომიტანა 2 მოწყალების ყუთი, რომელზეც მის მიერ მითითებული საქველმოქმედო ორგანიზაციის რეკვიზიტები ეწერა და თან გამიმეორა, რომ როგორც კი ორგანიზაციის ანგარიშზე თანხა ჩაირიცხებოდა, შემოსულ თანხას ჩემს მიერ წარდგენილ ანგარიშზე გადმომირიცხავდა.“
გვრიტუნა ჯაფარიძე ყვება, რომ სამი წლის მანძილზე მის ანგარიშზე თანხა არ გადმორიცხულა: „როდესაც ვურეკავდი გიორგის და ვეკითხებოდი, რატომ არ ირიცხებოდა თანხები მპასუხობდა, რომ სპეციალურად დამზადებული მოწყალების ყუთი მან უკვე დამიდგა მაღაზიაში და სხვა ვალდებულება ჩემს წინაშე არ გააჩნდა.“
დაახლოებით ერთი თვის წინ მაღაზიაში, სადაც გვრიტუნა ჯაფარიძე მუშაობს უცნობი ქალი შევიდა მოწყალების ყუთით და ცერემბრალური დამბლით დაავადებული ბავშვის დახმარება სთხოვა. გვრიტუნა ჯაფარიძემ ქალს ბავშვის ფოტოს ჩვენება სთხოვა და ნახა, რომ ფოტოზე მისი შვილი იყო.
„შევეცადე, გამერკვია ვინ იყო ეს ქალბატონი. აღმოჩნდა, რომ იგი მუშაობდა იმავე საქველმოქმედო ორგანიზაციაში, რომელშიც რამდენიმე წლის უკან მე გავწევრიანდი და მისი ხელმძღვანელი გახლდათ ჩემთვის უკვე კარგათ ნაცნობი გიორგი. ამის შემდეგ, დავუკავშირდი თავად გიორგის, მომხდარის ახსნა და ჩემი შვილის სახელის გამოყენებით მიღებული თანხების გადმორიცხვა მოვთხოვე. თუმცა, აღნიშნულზე კატეგორიული უარი განმიცხადა და მითხრა, რომ მისი შვილის სახელით თანხას არ აგროვებდა.
მომხდარის შემდეგ შევიტყვე, რომ ჩემთვის ნაცნობ ადამიანებს ჩემი შვილის დასახმარებლად მათთვის უცნობი მოქალაქეებისათვის (რომელთაც ხელში ყუთი ეჭირათ, ჩემი შვილის ბიოგრაფიასთან ერთად) შეუწირავთ თანხები, თუმცა ჩემს შვილს არც ერთი თეთრი არ მიუღია“ – ამბობს გვრიტუნა ჯაფარიძე.
დემოკრატიის ინსტიტუტის ინფორმაციით, საჩივარი აღნიშნულ ფაქტზე უკვე წარდგენილია აჭარის პროკურატურაში.
