ციფრული ტექნოლოგიების ეპოქაში ნახატების ტრადიციული გამოფენები თანამედროვე ადამიანისთვის შესაძლოა თანდათან მოსაწყენი და უინტერესო გახდეს. ვიზუალური ეფექტების ხანაში ხელოვნების „მომხმარებელიც“ სიახლეებს ითხოვს.
მხატვრობისა და ციფრული ტექნოლოგიების შერწყმით ხელოვანთა გაერთიანება „Culturespaces“-ი გამოფენების ტრადიციული ფორმების რევოლუციას ახდენს. უნიკალური მულტიმედია ტექნიკითა და მოწყობილობებით კომპანია აწყობს კლასიკოსი მხატვრების ციფრულ შოუებს, რაც შედევრებს დინამიზმს მატებს, აძლიერებს ემოციას დამთვალიერებელზე და შედეგად შოუ დაუვიწყარ სიამოვნებას ანიჭებს მნახველს.
„Culturespaces“ -ის ერთ-ერთი საგამოფენო სივრცე „Atelier des Lumières“-ი პარიზში, ლითონის ძველ ქარხანაშია განთავსებული. ატელიეში ე.წ. „შუქის სახელოსნოა“ (workshop of light) მოწყობილი, სადაც ციფრულ გამოფენაზე საჩვენებელ 3000-ზე მეტ მოძრავ გამოსახულებას აწყობენ 20 ლაზერული ვიდეოპროექტორის საშუალებით. ატელიეს მიერ მოწყობილი ერთ-ერთი პირველი და წარმატებული შოუ-გამოფენაა უზარმაზარ კედლებზე ნაჩვენები კლიმტის „ოქროს ხანის“ მოძრავი შედევრები, მხატვრისთვის დამახასიათებელი ოქროსფერი დეტალების ციმციმი წარმოუდგენელ შთაბეჭდილებას ახდენს მნახველზე.
ციფრული სტუდია „Atelier des Lumières“-ი ასევე აწყობს თანამედროვე ხელოვანთა გამოფენებს, რომლებსაც შესაძლებლობა აქვთ ტრადიციული გამოფენების ნაცვლად აქ მოაწყონ „შუქის სახელოსნოს“ მიერ შექმნილი ციფრული შოუ და შექმნან დამთვალიერებლისთვის ვიზუალურად ბევრად უფრო შთამბეჭდავი სამყარო.
„Culturespaces“-ის ერთ-ერთი პროექტია ასევე XVI საუკუნის მხატვრების: იერონიმუს ბოსხის, პიტერ ბრეიგელისა და ჯუზეპე არჩიმბოლდოს ციფრული გამოფენა. შუქებით აწყობილ შოუში ერთმანეთს ენაცვლება ბოსხის საზარელი, ფანტასტიკური არსებების უზარმაზარი ფიგურები, რასაც ანეიტრალებს ბრეიგელის სოფლის პეიზაჟები და არჩიმბოლდოს ხილით შექმნილი პორტრეტების წყება.
შოუ დაახლოებით 30 წუთს გრძელდება და 2000-ზე მეტი ციფრული გამოსახულებაა ნაჩვენები 7000 მ2 ფართობზე.
წყარო: carrieres-lumieres.com
წყარო: carrieres-lumieres.com culturespaces.com mymodernmet.com