Batumelebi | ბათუმში, ევროპის მოედანთან, McDonald’s-ი გაიხსნება ბათუმში, ევროპის მოედანთან, McDonald’s-ი გაიხსნება – Batumelebi
ნეტგაზეთი • RU

ბათუმში, ევროპის მოედანთან, McDonald’s-ი გაიხსნება

ბათუმში, ევროპის მოედანთან, McDonald’s-ის გახსნა იგეგმება. შპს „თ და კ რესტორნები“, რომელიც McDonald’s-ის სწრაფი კვების საერთაშორისო ქსელს ოპერირებს საქართველოში, ბათუმში, ევროპის მოედანთან, ყოფილი „ლიზარანის“ ადგილზე, „მაკდონალდსის“ რიგით მეორე რესტორნის გახსნას აპირებს.

კომპანიას სჭირდება 142 კვ/მ ტერიტორია ევროპის მოედანთან, სადაც „საზაფხულო, ევროპული სტანდარტების ტერასას“ მოაწყობს. კომპანიამ მერიას მიმდინარე წლის ნოემბერში აღნიშნული ფართობის 20 წლით იჯარით გადაცემის თხოვნით მიმართა.

კომპანიის მოთხოვნის შემდეგ 142 კვ/მ მიწის ფართობი მერიამ საკუთრებაში ცალკე საკადასტრო ერთეულად  დაირეგისტრირა. ამასთან, მერია თანახმაა ეს ნაკვეთი გადასცეს კომპანიას 20-წლიანი იჯარით – წლიური საიჯარო ქირა კი 15 500 ლარი იქნება.

მერიის აღნიშნულ გადაწყვეტილებას ბათუმის საკრებულოს თანხმობა ესაჭიროება.

საკითხი მიმდინარე წლის 18 იანვარს ჩანიშნული საკრებულოს სხდომის დღის წესრიგშია შეტანილი.

მერიის დოკუმენტების მიხედვით, ევროპის მოედანთან მდებარე 142 კვ/მ მიწის ნაკვეთის საბაზრო ღირებულება, გასული წლის დეკემბერში, სამხარაულის ექსპერტიზის ბიურომ 306 294 ლარით განსაზღვრა.

ბათუმის მერიის ინფორმაციით, საუბარია მონიშნული [ტროტუარსა და გაზონს შორის] ტერიტორიის იჯარით გაცემაზე სადაც მაგიდები და სკამები [„საზაფხულო ტერასა“]განთავსდება/ ფოტო: ბათუმის მერია

მთავარი ფოტო: მაკდონალდსის შენობა ბათუმში, ხიმშიაშვილის ქუჩაზე / თედო ჯორბენაძის ფოტო „ბათუმელების“ არქივიდან

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com